پشاور: احسن اقبال کی گرفتاری سیاسی انتقام کی نئی مثال ہے، اسفند یار ولی خان

پشاور (نمائندہ ڈیلی اردو) عوامی نیشنل پارٹی کے مرکزی صدر اسفند یار ولی خان نے ن لیگ کے مرکزی جنرل سیکرٹری احسن اقبال کی گرفتاری کی مذمت کرتے ہوئے کہا ہے کہ یہ سیاسی انتقام کی ایک نئی اور تازہ مثال ہے، احتساب اگر واقعی کرنا ہے تو بلا امتیاز کریں جس کا آغاز خود مجھ سے اور عمران خان سے کی جائے۔

ولی باغ چارسدہ سے جاری بیان میں اے این پی سربراہ نے کہا ہے کہ حکومتی وزراء کی کرپشن پر خاموشی اور اپوزیشن کو نشانہ بنانے سے تاثر مل رہا ہے کہ عمران خان نیب کے ذریعے اپوزیشن رہنمائوں کو خاموش کرنے کی ناکام کوشش کررہا ہے لیکن چیئرمین نیب کو سوچنا چاہیے کہ کل کو عمران خان نہیں ہوگا، پھر کیا کریں گے؟ سیاسی گرفتاریوں سے اپوزیشن کو ڈرانے دھمکانے کی غلط روایت بنائی جارہی ہے جو ملک کے سیاسی نظام کو کمزور کرنے کے مترادف ہے۔

انہوں نے کہا کہ صرف الزام لگانے اور پیشی پر گرفتار کرنے سے سیاسی انتقام واضح ہوگئی ہے، اس سے پہلے بھی کئی اپوزیشن رہنما صرف الزامات کی بنیاد پر جیل میں ہیں۔ عمران خان اور اسکی ٹیم اپنی کرپشن چھپانے کیلئے سپریم کورٹ کا سہارا لے رہی ہے، نیب کی جانب سے بی آر ٹی، مالم جبہ سکینڈل پر خاموشی اور حکومتی وزراء کے خلاف کارروائی نہ کرنا احتساب کو سیاسی انتقام ثابت کرنے کیلئے کافی ہے۔

انہوں نے عمران خان کو چیلنج کرتے ہوئے کہا کہ وہ بتائے کہ انہیں وراثت میں کیا کچھ ملا اور آج انکے اثاثے کتنے ہیں؟ انکے اثاثے اگر بڑھے ہیں تو ذریعہ معاش کیا ہے؟ علیمہ باجی نے تو سلائی مشینوں سے اربوں کمائے، موصوف بتائیں گے کہ وہ خود شاہانہ زندگی کس طرح بسر کررہے ہیں۔