پشاور: سی ٹی ڈی اور حساس اداروں کی مشترکہ کارروائی، ہائیکورٹ دھماکے کا دہشت گرد گرفتار

اسلام آباد (ش ح ط) کاؤنٹر ٹیررازم ڈیپارٹمنٹ خیبر پختونخوا اور حساس اداروں نے مشترکہ کارروائی کرتے ہوئے پشاور ہائیکورٹ دھماکے کا مرکزی ملزم کو گرفتار کرلیا۔

سی ٹی ڈی پولیس کے مطابق گرفتار ملزم اکرام اللہ عرف حبیب اللہ والد ولی محمد پشاور ہائیکورٹ کے باہر دھماکے میں ملوث اور افغانستان کے علاقے سرکانو کا رہائشی ہے۔ ملزم 12 دسمبر کو چمن بارڈر کے راستے پشاور پہنچا تھا اور حاجی کیمپ اڈا کے قریب مقامی ہوٹل میں قیام کیا۔

دہشت گرد اکرام اللہ نے یہ دھماکا بھاری رقم ک عوض اور کالعدم تنظیم تحریک طالبان پاکستان کی ایما پر دھماکا کیا۔ دھماکے کیلئے جان بوجھ کر 16 دسمبر کا انتخاب کیا گیا تھا۔ ملزم سے 29100 روپے پاکستانی، 100 امریکی ڈالر، ایک عدد موبائل فون اور دو افغان شناختی کارڈ برآمد ہوئے۔

یاد رہے کہ 16 دسمبر 2019 کو پشاور ہائیکورٹ کے باہر رکشے میں ہونے والے ریموٹ کنٹرول دھماکے میں پولیس اہلکار سمیت 12 افراد زخمی ہو گئے تھے۔ بم ڈسپوزل اسکواڈ کے مطابق دھماکے میں 4 سے 5 کلوگرام بارودی مواد استعمال کیا گیا تھا۔ سی سی پی او پشاور کے مطابق دھماکہ 12 بجکر 5 منٹ پر ہوا۔

دھماکے کی تحقیقات کیلئے کاؤنٹر ٹیررازم ڈیپارٹمنٹ کے ڈی آئی جی کی سربراہی میں انوسٹی گیشن ٹیم تشکیل دی گئی تھی۔