پشاور میں رنگ روڈ کے قریب دھماکا، ایک نوجوان ہلاک، 3 زخمی

پشاور (نمائندہ ڈیلی اردو) خیبر پختونخوا کے دارالحکومت پشاور میں موٹر سائیکل بم دھماکے کے نتیجہ میں ایک شخص ہلاک جبکہ تین زخمی ہو گئے۔

پشاور کے علاقے رینگ روڈ پر ہوٹل کے قریب دھماکا ہوا ہے جس سے ایک نوجوان ہلاک جب کہ 3 افراد زخمی ہو گئے۔ ابتدائی اطلاعات کے مطابق دھماکا موٹر سائیکل کی مرمت کے دوران ہوا۔

دھماکا موٹرسائیکل مکینک کی دکان کے باہر ہوا۔ دھماکے میں میگنٹ ہائی ایکسپلوسیو بم کا استعمال ہوا ہے۔ دھماکے میں موٹرسائیکل کا مالک بھی زخمی ہوا۔

بم ڈسپوزل یونٹ کا کہنا ہے کہ موٹر سائیکل میں 200 گرام مقناطیسی آئی ای ڈی نصب تھی، مکینک کے شاگرد نے موٹر سائیکل اسٹینڈ کو ہتھوڑا مارا تو دھماکا ہوگیا، دھماکے میں مکینک کا شاگرد ہلاک ہوا، ایک زخمی کی حالت نازک ہے۔