پشاور میں سی ٹی ڈی کا آپریشن، ایک افغان سمیت 3 پاکستانی طالبان ہلاک

پشاور (نمائندہ ڈیلی اردو) پاکستان کے صوبے خیبر پختونخوا کے دارالحکومت پشاور کے علاقے ریگی للمہ میں کاؤنٹر ٹیررازم ڈیپارٹمنٹ (سی ٹی ڈی) نے کالعدم تحریک طالبان پاکستان (ٹی ٹی پی) کے خلاف بڑے پیمانے پر کارروائی کرتے ہوئے 3 دہشت گردوں کو ہلاک کر دیا۔

سی ٹی ڈی کے حکام کے مطابق ہلاک ہونے والوں میں افغان شہری عبداللہ عرف جواد بھی شامل ہے، جو متعدد دہشت گردی کے واقعات میں مطلوب تھا۔ عبداللہ عرف جواد پشاور میں 18 دہشت گرد حملوں میں ملوث رہا، جن میں 12 پولیس اور فرنٹیئر کانسٹیبلری (ایف سی) کے اہلکار ہلاک ہوئے جبکہ متعدد افراد زخمی بھی ہوئے۔ ان حملوں میں ڈی ایس پی سردار حسین سمیت 5 پولیس اہلکار، 2 ایف سی اہلکار اور دیگر جوان بھی نشانہ بنے۔

سی ٹی ڈی کے مطابق ہلاک دہشت گرد گروہ پولیس موبائلوں کو نذر آتش کرنے، بھتہ خوری، آئی ای ڈی دھماکوں اور فائرنگ کی وارداتوں میں ملوث تھا۔ یہ گروہ کالعدم ٹی ٹی پی سے تعلق رکھتا تھا اور غیر ملکی ہینڈلرز اور فنڈنگ کے ساتھ مزید حملوں کی منصوبہ بندی کر رہا تھا۔

وزیر داخلہ محسن نقوی نے سی ٹی ڈی کی کارروائی کو سراہتے ہوئے کہا کہ بھارتی حمایت یافتہ دہشت گردوں کا خاتمہ ایک بڑی کامیابی ہے۔