پشاور میں سی ٹی ڈی کی کارروائی، کالعدم تنظیم تحریک طالبان پاکستان کا مطلوب دہشت گرد گرفتار

پشاور (ڈیلی اردو) کاؤنٹر ٹیررازم ڈیپارٹمنٹ نے پشاور میں کارروائی کرتے ہوئے کالعدم تنظیم تحریک طالبان پاکستان کے مطلوب دہشت گرد کو گرفتار کرلیا۔ جبکہ دوسری کارروائی میں بڑی تعداد میں اسلحہ اور مارٹر گولے برآمد کرلیا گیا۔

تفصیلات کے مطابق خیبر پختونخوا کے صوبائی دارالحکومت پشاور میں کاؤنٹر ٹیرر ازم ڈیپارٹمنٹ (سی ٹی ڈی) نے کارروائی کے دوران جنرل بس سٹینڈ سے کالعدم تنظیم تحریک طالبان پاکستان (ٹی ٹی پی) کے دہشتگرد کو گرفتار کرلیا۔ سی ٹی ڈی کا کہنا ہے کہ ملزم 2008 میں پولیس پر حملے میں ملوث تھا۔ حملے میں 3 پولیس اہلکار زخمی ہوئے تھے اورملزم کی گرفتاری پر 5 لاکھ روپے انعام تھا، دہشتگرد کو حراست میں لے کر نامعلوم مقام پر منتقل کر دیا گیا۔

دوسری جانب حساس ادارے اور پولیس نے متنی کے علاقے سپین میں کارروائی کے دوران بڑی تعداد میں اسلحہ اور مارٹر گولے برآمد کرلئے۔ پولیس ذرائع کے مطابق مارٹرگولے دہشتگردی کی غرض سے چھپائے گئے تھے۔

ایس پی صاحبزادہ سجاد نے کہا کہ کارروائی کشن گڑھ روڈ پر کی گئی، کارروائی میں 29 مارٹرگولے برآمدہوئے، ملزموں کی گرفتاری کیلئے کوششیں جاری ہیں۔