پشاور میں شمشتو چوکی پر بارودی مواد سے حملہ، پولیس اہلکار زخمی

پشاور(ڈیلی اردو) خیبرپختونخواہ کے شورش زدہ دارلحکومت پشاور کے تھانہ ارمڑ کی حدود میں شمشتو پولیس چوکی کو بارودی مواد سے نشانہ بنایا گیا، جس کے نتیجے میں ایک پولیس اہلکار زخمی ہوگیا، جبکہ حملے کے دوران علاقے میں واقع ایک اسکول کو بھی نقصان پہنچنے کی اطلاع ہے۔

ابتدائی اطلاعات کے مطابق شمشتو چوکی پر بارودی مواد کے ذریعے حملہ کیا گیا، جس کے نتیجے میں پولیس اہلکار زیشان زخمی ہوئے۔ واقعے کے فوری بعد پولیس افسران بھاری نفری کے ہمراہ جائے وقوعہ پر پہنچ گئے اور علاقے کو گھیرے میں لے کر سرچ اور سیکیورٹی اقدامات شروع کر دیے۔

ذرائع کے مطابق حملے میں اسکول کی عمارت کو بھی نشانہ بنایا گیا، تاہم واقعے میں اسکول کے طلبہ یا عملے کے حوالے سے کسی جانی نقصان کی اطلاع سامنے نہیں آئی۔

پولیس نے علاقے میں سیکیورٹی مزید سخت کرتے ہوئے ممکنہ خطرات کے پیش نظر اضافی نفری تعینات کر دی ہے، جبکہ واقعے کی نوعیت اور حملہ آوروں سے متعلق مزید تحقیقات جاری ہیں۔

پولیس حکام کے مطابق ابتدائی کارروائی کے بعد شواہد اکٹھے کیے جا رہے ہیں اور واقعے میں ملوث عناصر کا سراغ لگانے کے لیے مختلف پہلوؤں سے تحقیقات کی جا رہی ہیں۔