پشاور میں پولیس موبائل کے قریب دھماکا، ایک اہلکار ہلاک، 9 زخمی

پشاور (ڈیلی اردو رپورٹ) پاکستان کے شورش زدہ صوبے  خیبرپختونخوا کے دارالحکومت پشاور میں کوہاٹ روڈ قمر دین گڑھی کے مقام پر پولیس موبائل کے قریب زوردار دھماکا ہوا ہے، جس کے نتیجے میں ایک پولیس اہلکار ہلاک جبکہ دیگر پولیس اہلکاروں اور شہریوں سمیت 9 افراد زخمی ہوگئے۔

ڈیلی اردو کے مطابق کیپٹل سٹی پولیس افسر (سی سی پی او) پشاور ڈاکٹر میاں سعید نے بتایا کہ قمر دین چوک کے قریب پولیس موبائل معمول کے گشت پر تھی کہ اچانک سڑک کنارے نصب بارودی مواد کا دھماکا ہوگیا۔ دھماکے کے نتیجے میں پولیس موبائل کو شدید نقصان پہنچا جبکہ جائے وقوعہ پر خوف و ہراس پھیل گیا۔

سی سی پی او کے مطابق زخمی پولیس اہلکاروں کو فوری طور پر قریبی ہسپتال منتقل کر دیا گیا ہے، جبکہ پولیس اور سیکیورٹی اداروں نے علاقے کو گھیرے میں لے کر شواہد اکھٹے کرنا شروع کر دیے ہیں۔

ہسپتال اور پولیس ذرائع نے تصدیق کی ہے کہ زخمی ہونے والوں میں چار پولیس اہلکار شامل ہیں جن کی شناخت اے ایس آئی شاہ فیصل، کانسٹیبل سجاد، کانسٹیبل نور اللہ اور ڈرائیور کانسٹیبل ضیاء اللہ کے ناموں سے ہوئی ہے۔ زخمی کانسٹیبل سجاد زخموں کی تاب نہ لاتے ہوئے ہسپتال میں دم توڑ گیا۔

پولیس کے مطابق دھماکے میں زخمی ہونے والے شہریوں میں حمزہ، جہانگیر، عمر، خمزہ خان اور ظاہر جان شامل ہیں، جنہیں ابتدائی طبی امداد دی جا رہی ہے۔

پولیس و تحقیقاتی اداروں نے دھماکے کو دہشت گردی کا واقعہ قرار دیتے ہوئے تحقیقات کا آغاز کر دیا ہے۔ ابتدائی شبہ ہے کہ بارودی مواد ریموٹ کنٹرول یا ٹائم ڈیوائس کے ذریعے دھماکہ کیا گیا۔

یاد رہے کہ پشاور اور خیبرپختونخوا کے دیگر اضلاع میں حالیہ مہینوں کے دوران پولیس کو بار بار دہشت گرد حملوں کا سامنا کرنا پڑا ہے اور پولیس اہلکار اکثر ان حملوں کی زد میں آتے ہیں۔