پشاور، سوات اور باجوڑ میں دہشت گردوں کے حملے، دو اہلکار ہلاک

پشاور (ڈیلی اردو) صوبائی دارالحکومت پشاور سمیت سوات اور باجوڑ میں پولیس چوکیوں اور تھانے پر حملے کے دوران 2 اہلکار ہلاک ہو گئے۔

خیبر پختونخوا کے دارالحکومت پشاور میں تھانہ متھرا کی پولیس چوکی اصحاب بابا پر دہشت گردوں نے دستی بم سے حملہ کردیا جو زوردار دھماکے سے پھٹ گیا جس سے علاقے میں خوف وہراس پھیل گیا تھا۔

پولیس نے بتایا کہ دہشت گرد موٹر سائیکل پر آئے تھے دستی بم پھٹنے سے دیواروں کو جزوی نقصان پہنچا۔

پولیس چوکیوں پر حملے کے واقعات میں 2 اہلکار ہلاک ہو گئے۔

سوات میں منگل اور بدھ کی درمیانی شب پولیس چوکی سمبٹ پر نامعلوم دہشت گردوں نے اچانک فائرنگ کردی اور دستی بم بھی پھینکے، اس پر پولیس ہیڈ کانسٹیبل مشتاق احمد ہلاک جبکہ دوسرا اہلکار زخمی ہوگیا۔دونوں جانب سے شدید فائرنگ کا تبادلہ کے بعد دہشتگرد فرار ہونے میں کامیاب ہوگئے۔

واقعہ کی اطلاع ملتے ہی پولیس کی بھاری نفری اور سیکورٹی فورسز جائے وقوعہ پر پہنچ گئی اور سیکورٹی فورسز نے علاقے کو گھیرے میں لے کر سرچ آپریشن شروع کردیا۔

ادھر باجوڑ کی تحصیل خار کے علاقے حاجی لونگ پل پولیس چوکی پر رات گئے دہشت گردوں کے حملے میں حولدار عالم زیب ہلاک ہو گئے۔ جس کے بعد پولیس کی جوابی کارروائی پر حملہ آور فرار ہوگئے۔ پولیس نے حملہ آوروں کی تلاش شروع کردی ہے۔