پنجاب میں عیدالاضحیٰ پر دہشتگردی کا بڑا منصوبہ ناکام، داعش کی خاتون رکن سمیت 9 دہشت گرد گرفتار

لاہور (بیورو رپورٹ) کاؤنٹر ٹیررازم ڈیپارٹمنٹ (سی ٹی ڈی) پنجاب نے دعویٰ کیا ہے کہ اس نے عید الاضحیٰ پر دہشت گردی کا بڑا منصوبہ ناکام بناتے ہوئے صوبے کے 3 حساس شہروں سے کالعدم تنظیم داعش کی خاتون رکن سمیت 9 دہشت گردوں کو گرفتار کرلیا۔

سی ٹی ڈی پنجاب نے ملتان، بہاولپور اور ڈیرہ غازی خان میں عید الاضحیٰ پر دہشت گردی کا بڑا منصوبہ ناکام بناتے ہوئے داعش کی خاتون رکن بلقیس سمیت 9 دہشت گردوں کو گرفتار کرلیا۔ دہشت گردوں کے قبضے سے دستی بم، خودکش جیکٹ بنانے کا سامان اور نقدی برآمد۔#CTD #TTP #ISKP #Punjab #Pakistan

— Shabbir Hussain Turi (@ShabbirTuri) June 27, 2023

سی ٹی ڈی حکام کے مطابق سیکیورٹی فورسز نے ملتان، بہاولپور اور ڈیرہ غازی خان میں خفیہ اطلاعات کی بنیاد پر کارروائی کے دوران خاتون سمیت 9 دہشت گردوں کو گرفتارکر لیا جن کا تعلق کالعدم تنظیم سے ہے، گرفتار خاتون بھی کالعدم داعش کے نیٹ ورک کی متحرک رکن ہے۔

دہشت گردوں سے دستی بم، خودکش جیکٹ بنانے کا سامان اور نقدی برآمد کی گئی، گرفتار دہشت گردوں میں عدنان، عبدالحلیم، شیراز، بلقیس اور عمر بن خالد کے نام شامل ہیں۔

سی ٹی ڈی حکام کے مطابق کالعدم تنظیم کے نیٹ ورک عیدالاضحیٰ پر دہشت گردی کا منصوبہ بنا رہے تھے، دہشت گردوں کے خلاف مقدمات درج کرکے تفتیش شروع کردی ہے۔