پنجاب: کوٹ ادو میں گھر کے اندر پراسرار دھماکا، 6 افراد ہلاک

کوٹ ادو (ڈیلی اردو) صوبہ پنجاب کے ضلع کوٹ ادو کے علاقے دائرہ دین پناہ میں ایک گھر میں پراسرار دھماکے کے نتیجے میں 2 خواتین اور 2 بچوں سمیت 6 افراد ہلاک اور 2 زخمی ہوگئے۔

پولیس کے مطابق دھماکے میں ہلاک ہونے والے افراد کباڑ کا کام کرتے تھے، دھماکے کے وقت بھی کباڑ کی چھانٹی کی جا رہی تھی۔

ریسکیو 1122 کے مطابق واقعے میں 5 افراد ہلاک اور 3 زخمی ہوگئے ہیں، ہلاک ہونے والے افراد کا تعلق ایک ہی خاندان سے ہے، بعد ازاں زخمی ہونے والا بچہ ہسپتال میں دم توڑ گیا تھا۔

واقعے کے بعد پولیس بم ڈسپوزل اسکواڈ اور متعلقہ سیکیورٹی اداروں کی ٹیمیں موقع پر پہنچ گئیں، پولیس کے مطابق دھماکے کی نوعیت کے بارے میں تحقیقات کی جارہی ہیں، یہ کہنا قبل از وقت ہوگا کہ دھماکا کس چیز کا تھا۔

ریسکیو نے لاشوں اور زخمیوں کو ڈسٹرکٹ ہیڈکوارٹرز ہسپتال (ڈی ایچ کیو) کوٹ ادو منتقل کردیا ہے۔

مظفرگڑھ کے ڈسٹرکٹ پولیس افسر سید حسنین حیدر موقع پر پہنچ گئے، میڈیا سے بات کرتے ہوئے ان کا کہنا تھا کہ واقعے کی تحقیقات کی جا رہی ہیں، زخمیوں کو بہتر طبی سہولیات فراہم کی جا رہی ہیں۔

نگران وزیر اعلیٰ پنجاب کا اظہار افسوس، واقعے کی رپورٹ طلب

نگران وزیر اعلیٰ پنجاب محسن نقوی نے کوٹ ادو کے قریبی قصبہ دائرہ دین پناہ میں دھماکے کے نتیجے میں انسانی جانوں کے ضیاع پر افسوس کا اظہار کیا ہے۔

وزیر اعلیٰ محسن نقوی نے سوگوار خاندان سے ہمدردی کا اظہار کیا ہے اور آئی جی سے افسوسناک واقعے کی رپورٹ طلب کرلی۔

محسن نقوی نے ہدایت کی کہ واقعے کی تحقیقات کر کے حقائق سامنے لائے جائیں۔