ڈی آئی خان: جامع مسجد اور مرکزی امام بارگاہ پر رات کے وقت دہشتگردوں کا حملہ

ڈیرہ اسماعیل خان(ڈیلی اردو) خیبرپختونخواہ کے جنوبی ضلع ڈیرہ اسماعیل خان کی تحصیل کلاچی میں رات کے وقت جامع مسجد فاطمۃ الزہرہ اور مرکزی امام بارگاہ حضرت امام حسینؑ پر نامعلوم دہشتگردوں نے حملہ کیا۔

 عینی شاہدین کے مطابق پہلے شدید فائرنگ کی گئی اور اس کے فوراً بعد ایک زوردار دھماکہ ہوا، جس کی آواز دور دور تک سنائی دی اور علاقے میں خوف و ہراس پھیل گیا۔

 دھماکے سے جامع مسجد، امام بارگاہ، لنگرخانہ اور ملحقہ متعدد دکانیں بری طرح متاثر ہوئیں، تاہم خوش قسمتی سے کوئی جانی نقصان نہیں ہوا لیکن مالی نقصان بھاری ہوا ہے۔

 اطلاع ملتے ہی پولیس اور ریسکیو ٹیمیں موقع پر پہنچ گئیں، علاقے کو گھیرے میں لے کر شواہد اکٹھے کیے گئے اور سرچ آپریشن شروع کر دیا گیا۔

 واقعے کی نوعیت تاحال معلوم نہیں ہو سکی، تاہم سیکیورٹی فورسز نے علاقے میں گشت مزید بڑھا دیا ہے۔ 

واضح رہے کہ دو روز قبل اسی امام بارگاہ میں چہلم امام حسینؑ کی مجالس اختتام پذیر ہوئی تھیں۔