ڈی آئی خان میں نامعلوم دہشتگردوں کی فائرنگ، سابق ناظم ہلاک

ڈیرہ اسماعیل خان(ڈیلی اردو) خیبرپختونخواہ کے شورش زدہ ضلع ڈیرہ اسماعیل خان کی تحصیل کلاچی میں نامعلوم دہشتگردوں نے سابق ناظم حبیب خان کی گاڑی کو فائرنگ کا نشانہ بنا دیا، جس کے نتیجے میں وہ ہلاک جبکہ ان کا ڈرائیور ندیم شدید زخمی ہوگیا۔

پولیس کے مطابق حبیب خان اپنے ڈرائیور کے ہمراہ گاڑی میں جا رہے تھے کہ نامعلوم دہشتگردوں نے ان کی گاڑی پر اچانک فائرنگ کردی۔ فائرنگ سے حبیب خان موقع پر ہی ہلاک ہوگئے، جبکہ ڈرائیور ندیم کو شدید زخمی حالت میں طبی امداد کے لیے ہسپتال منتقل کردیا گیا۔

واقعے کے بعد حبیب خان کی لاش بھی ہسپتال منتقل کردی گئی۔ پولیس نے علاقے کی ناکہ بندی کرکے حملہ آوروں کی تلاش اور گرفتاری کے لیے سرچ آپریشن شروع کردیا ہے۔

پولیس کا کہنا ہے کہ واقعے کی مزید تحقیقات جاری ہیں، جبکہ حملے میں ملوث نامعلوم دہشتگردوں کی شناخت اور گرفتاری کے لیے کارروائی کی جا رہی ہے۔