ڈیرہ اسماعیل خان میں سی ٹی ڈی کا آپریشن، کالعدم ٹی ٹی پی کا مطلوب کمانڈر ہلاک

ڈی آئی خان (نمائندہ ڈیلی اردو) صوبہ خیبر پختونخوا کے ضلع ڈیرہ اسماعیل خان کے علاقے درابن میں انٹیلی جنس بیسڈ آپریشن میں کالعدم تحریک طالبان پاکستان (ٹی ٹی پی) کا اہم کمانڈر ہلاک کردیا گیا۔

تفصیلات کے مطابق تھانہ ڈیرہ ٹاؤن کی حدود علاقہ حکمت آباد جلیبی موڑ کے قریب انٹیلی جنس بیسڈ آپریشن کے دوران کاؤنٹر اینڈ ٹیررازم ڈیپارٹمنٹ (سی ٹی ڈی) کی جانب سے اہم کارروائی کے دوران ٹی ٹی پی مشال گروپ کا انتہائی مطلوب و اشتہاری کمانڈر کفایت اللہ مارا گیا۔

ہلاک ٹی ٹی پی کمانڈر تھانہ درابن حملہ کیس سمیت دیگر کئی مقدمات میں مطلوب تھا۔ ہلاک دہشت گرد کے قبضہ سے اسلحہ و کارتوس و ہینڈ گرنیڈ برآمد کر لیا گیا ہے۔

کاؤنٹر اینڈ ٹیررازم ڈیپارٹمنٹ کی آپریشن ٹیم نے تھانہ ڈیرہ ٹاؤن کی حدود علاقہ حکمت آباد جلیبی موڑ کے قریب دہشتگردوں کی موجودگی کی اطلاع پر جونہی انٹیلی جنس بیسڈ آپریشن کا آغاز کیا۔ اس دوران وہاں پہلے سے موجود دہشتگردوں نے سی ٹی ڈی اہلکاروں پر فائرنگ کر دی۔

پولیس کے مطابق سی ٹی ڈی پولیس نے جوابی کارروائی کرتے ہوئے فائرنگ شروع کی اس فائرنگ تبادلہ کے بعد سی ٹی ڈی پولیس نے سرچ آپریشن کا آغاز کیا۔

سی ٹی ڈی پولیس کو سرچ آپریشن کے دوران جائے وقوعہ پر ایک دہشت گرد جو فائرنگ تبادلہ کے دوران ہلاک ہوا تھا پڑا ملا۔ ہلاک دہشتگرد کی شناخت کفایت اللہ ولد دوران خان قوم موچی سکنہ کڑی بختیار درابن کلاں کے نام سے ہوئی۔

ہلاک دہشتگرد سے ایک عدد ایس ایم جی فولڈنگ بٹ، 4 عدد میگزین ،37 عدد کارتوس، ایک عدد ہینڈ گرنیڈ، ایک پاکٹ سائز ڈائری جس میں کفایت اللہ کا نام درج تھا اور ایزی پیسہ کارڈ بنام دوران خان برآمد ہوا۔ ہلاک ہونے والے دہشت گرد کے دیگر ساتھی رات کی تاریکی کا فائدہ اُٹھا کر فرار ہونے میں کامیاب ہوگئے۔

یاد رہے کہ تھانہ درابن حملے میں سیکیورٹی فورسز کے 24 اہلکار اور 33 زخمی ہوئے تھے۔