کلاچی : پولیو ڈیوٹی سے واپس آنے والے 2 اہلکار دہشتگردوں کے ہاتھوں اغواء

ڈیرہ اسماعیل خان(ڈیلی اردو) خیبرپختونخواہ کے شورش زدہ ضلع ڈیرہ اسماعیل خان کی تحصیل کلاچی کے علاقے کوٹ دولت سے پولیو ڈیوٹی مکمل کرنے کے بعد واپس آنے والے پولیو ٹیم کے دو اہلکاروں کو مبینہ طور پر دہشتگردوں نے اغواء کرلیا۔

ذرائع کے مطابق پولیو ٹیم آفیسر مبشر حسن اور ویکسینیشن سپروائزر جمعہ خان جمعہ کے روز کوٹ دولت میں ڈیوٹی انجام دینے کے بعد واپس روانہ ہوئے، تاہم اس کے بعد دونوں اہلکار لاپتہ ہوگئے اور ان کا اپنے اہلخانہ سے رابطہ منقطع ہوگیا۔

دونوں مغوی اہلکاروں کا تعلق یونین کونسل ہتھالہ سے بتایا جاتا ہے۔ واقعے کے بعد مبشر حسن کے بھائی سخی جان نے مقامی پولیس کو اطلاع دی اور دونوں کی گمشدگی سے آگاہ کیا۔

ذرائع کے مطابق ابتدائی طور پر شبہ ظاہر کیا گیا تھا کہ دونوں اہلکاروں کو اغواء کیا گیا ہے، تاہم مقامی ذرائع کا کہنا ہے کہ انہیں دہشتگردوں نے اغواء کیا ہے۔ واقعے کے بعد پولیس اور سکیورٹی اداروں نے مغوی اہلکاروں کی تلاش کے لیے کارروائی شروع کردی ہے۔