شمالی وزیرستان میں انٹیلی جنس آپریشن، 8 دہشتگرد ہلاک

شمالی وزیرستان(ڈیلی اردو) خیبرپختونخواہ کے شورش زدہ قبائلی ضلع شمالی وزیرستان میں خفیہ اطلاعات کی بنیاد پر کیے گئے آپریشن کے دوران 8 دہشتگرد ہلاک ہوگئے، جبکہ کارروائی میں دہشتگردوں کے متعدد ٹھکانوں کو بھی تباہ کیا گیا۔

ذرائع کے مطابق علاقے میں دہشتگردوں کی موجودگی کی اطلاع پر سکیورٹی فورسز نے کارروائی شروع کی۔ آپریشن کے دوران فائرنگ کے تبادلے میں 8 دہشتگرد مارے گئے، جبکہ ان کے قبضے سے بڑی تعداد میں اسلحہ، گولہ بارود اور دیگر عسکری سامان برآمد کیا گیا۔

سکیورٹی ذرائع کا کہنا ہے کہ کارروائی کے دوران دہشتگردوں نے پیش قدمی سے بچنے کے لیے ایک مسجد کی آڑ لینے کی کوشش کی۔ فورسز نے کارروائی میں مسجد کے تقدس اور شہریوں کے تحفظ کو مدنظر رکھتے ہوئے احتیاطی تدابیر اختیار کیں۔

آپریشن کے بعد علاقے میں کلیئرنس اور سرچ کارروائی بھی کی گئی تاکہ باقی ماندہ دہشتگردوں کو دوبارہ منظم ہونے یا علاقے میں اپنے ٹھکانے قائم کرنے کا موقع نہ مل سکے۔ سکیورٹی فورسز نے دہشتگردوں کے زیر استعمال متعدد مبینہ ٹھکانے بھی تباہ کیے۔

ذرائع کے مطابق کارروائی کے دوران برآمد ہونے والا اسلحہ اور دیگر سامان علاقے میں دہشتگردوں کے عسکری ڈھانچے کی موجودگی کی نشاندہی کرتا ہے۔ تاہم ہلاکتوں اور کارروائی کی دیگر تفصیلات کی آزادانہ تصدیق نہیں ہوسکی۔