ڈیرہ اسماعیل خان: پولیس وین پر دستی بم حملے میں زخمی ایس ایچ او شہید ہو گیا

ڈی آئی خان (توقیر حسین زیدی) خیبر پختونخوا کے ضلع ڈیرہ اسماعیل خان میں پولیس وین پر دستی بم حملے میں زخمی ہونے والے ایس ایچ او عنایت اللہ دم توڑ گئے۔

تفصیلات کے مطابق ڈی آئی خان میں پولیس وین پر حملے کے زخمی ایس ایچ او جاں بر نہ ہو سکے، مقامی ہسپتال میں زیر علاج عنایت اللہ آج شہید ہو گئے۔

چند روز قبل دہشت گردوں نے تھانہ گومل کی پولیس وین کو نشانہ بنایا تھا، معمول کی گشت کے دوران حملہ آوروں نے وین پر دستی بم پھینکا، جس میں ایس ایچ او عنایت اللہ سمیت ہیڈ کانسٹیبل شفیق، کانسٹیبل کوثر خان اور کانسٹیبل سعید الرحمن اور ایک راہ گیر زخمی ہو گئے تھے۔

ایس ایچ او کو شدید زخمی حالت میں طبی امداد کے لیے ڈی ایچ کیو ہسپتال پہنچایا گیا تھا، پولیس وین پر حملہ کرنے والا دہشت گرد جوابی فائرنگ میں مارا گیا تھا، پولیس کے مطابق ہلاک حملہ آور کے پاس دھماکا خیز مواد بھی موجود تھا جسے ناکارہ بنانے کے لیے بی ڈی ایس کو طلب کیا گیا تھا۔

ٹانک کے علاقے میں اس واقعے کے بعد پورے علاقے کو محاصرہ کر کے سرچ آپریشن بھی کیا گیا۔