ڈیرہ اسماعیل خان: کلاچی میں چنگ چی کھڑی کرنے پر فائرنگ، 2 بھائیوں سمیت 3 افراد جاں بحق، 2 زخمی

ڈی آئی خان (توقیر حسین زیدی) ڈیرہ اسماعیل خان کی تحصیل کلاچی میں شیخی گیٹ کے قریب چنگ چی کھڑی کرنے پر دو گروپوں میں تلخ کلامی پر فائرنگ سے دو بھائی جاں بحق تیسرا بھائی اور ایک راہ گیر شدید زخمی ہو گئے۔

تفصیلات کے مطابق ڈیرہ اسماعیل خان کی تحصیل کلاچی میں شیخی گیٹ کے قریب چنگ چی کھڑی کرنے پر دو گروپوں میں تلخ کلامی ہوئی اور بات بڑھنے پر ریڑھی بان گروپ عبد اللہ ولد شاہ جہاں قوم بلوچ محلہ رانا زئی، نور زمان اور رنگینی خان نے فائرنگ کردی، جس کے نتیجے میں چنگ چی چلانے والے دو سگے بھائی قسمت خان اور محمد رمضان ولد خالق قوم بلوچ سکنہ محلہ رانا زئی کلاچی جاں بحق ہو گئے جبکہ ان کا تیسرا بھائی دل جان اور ایک راہ گیر حبیب ولد غلام رسول قوم کمہار سکنہ محلہ بحلول خیل شدید زخمی ہو گئے۔

جاں بحق و زخمیوں کو ڈی ایچ کیو ہسپتال ڈی آئی خان منتقل کر دیا گیا۔ فائرنگ کرنے والے ملزمان فرار ہو گئے۔ پولیس ملزمان کی گرفتاری کے لئے گھروں پر چھاپے مار رہی ہے۔