کابل: محسن نقوی اور سراج الدین حقانی کی ملاقات، دہشتگردی سمیت دیگر امور پر تبادلہ خیال

کابل (ڈیلی اردو) وفاقی وزیر داخلہ محسن نقوی نے کابل میں اپنے افغان ہم منصب سراج الدین حقانی سے ایک اہم ملاقات کی، جس میں انسداد دہشتگردی، سرحدی دراندازی، کالعدم تحریک طالبان، منشیات کی اسمگلنگ اور پاک افغان بارڈر مینجمنٹ جیسے حساس معاملات زیر غور آئے۔

ملاقات میں دونوں وزراء نے سرحد پار دہشتگردی کے تدارک اور مشترکہ تعاون کو مؤثر بنانے پر اتفاق کیا، جبکہ افغان سرزمین کو دہشتگرد گروہوں کی محفوظ پناہ گاہ نہ بننے دینے پر زور دیا گیا۔ محسن نقوی نے واضح کیا کہ دہشتگرد تنظیمیں دونوں ممالک کے امن کیلئے سنگین خطرہ ہیں، اور ان کا قلع قمع باہمی تعاون سے ہی ممکن ہے۔

پاکستان میں غیرقانونی طور پر مقیم افغان باشندوں کی واپسی اور مستقبل میں قانونی داخلے کے طریقہ کار پر بھی تبادلہ خیال کیا گیا۔ محسن نقوی نے کہا کہ پاکستان نے دہائیوں تک لاکھوں افغان شہریوں کی میزبانی کی، لیکن اب سرحدی نظم و نسق اور قانون پر عملدرآمد ناگزیر ہے۔

کابل پہنچنے پر افغان نائب وزیر داخلہ مولوی محمد نبی عمری نے محسن نقوی کا پرتباک خیرمقدم کیا، جبکہ افغان وزارت داخلہ آمد پر سراج الدین حقانی نے ان کا استقبال کیا۔ محسن نقوی کے ہمراہ نمائندہ خصوصی محمد صادق اور سیکریٹری داخلہ بھی موجود تھے۔