کابل میں سابق افغان حکومت کے جج عبدالمنیر نوری فائرنگ سے ہلاک

کابل(ڈیلی اردو)افغان دارالحکومت کابل میں سابق حکومت کے ایک جج عبدالمنیر نوری کو مسلح حملے میں ہلاک کیے جانے کی اطلاع ہے۔

مقامی ذرائع کے مطابق واقعہ منگل کی صبح تقریباً 6 بجے کابل کے گیارہویں ضلع میں سرائے شمالی کے علاقے میں پیش آیا، جہاں نامعلوم مسلح افراد نے عبدالمنیر نوری کو نشانہ بنایا۔

ذرائع کا کہنا ہے کہ عبدالمنیر نوری سابق افغان حکومت کے دور میں صوبہ کاپیسا کے ضلع نجراب میں بطور جج خدمات انجام دے رہے تھے۔ طالبان کے دوبارہ اقتدار میں آنے کے بعد وہ کابل کی ایک نجی یونیورسٹی میں تدریس سے وابستہ ہوگئے تھے۔

یہ واقعہ ایسے وقت میں سامنے آیا ہے جب افغانستان کے مختلف علاقوں میں سابق حکومت سے وابستہ اہلکاروں اور سیکیورٹی فورسز کے سابق ارکان کو نشانہ بنائے جانے کے واقعات کی اطلاعات سامنے آ رہی ہیں۔

ذرائع کے مطابق ایک روز قبل بھی صوبہ تخار میں سابق افغان حکومت کے دو سیکیورٹی اہلکاروں کی لاشیں ملی تھیں، جنہیں مبینہ طور پر قتل کیا گیا تھا۔