کالعدم بلوچ لبریشن آرمی کے خطرات کے بعد جعفر ایکسپریس کی سروس معطل

کوئٹہ (ڈیلی اردو/بی بی سی) پاکستان کے شورش زدہ صوبے بلوچستان سے تعلق رکھنے والی مسافر ٹرین جعفر ایکسپریس کو سکیورٹی وجوہات کی بنیاد پر دو روز (25 اور 26 اگست) کے لیے معطل کر دیا گیا ہے۔

کوئٹہ ریلوے کے ایک سینئر اہلکار نے برطانوی خبر رساں ادارے بی بی سی کو فون پر بتایا کہ اسی وجہ سے پیر کی صبح ٹرین کوئٹہ سے پشاور کے لیے روانہ نہیں ہو سکی۔ اس سے قبل 11 سے 14 اگست تک بھی سیکورٹی وجوہات کی بنا پر جعفر ایکسپریس کی سروس معطل رہی تھی۔

یاد رہے کہ مارچ 2025 میں مسلح افراد نے جعفر ایکسپریس پر حملہ کر دیا تھا، جس میں عسکری اہلکاروں سمیت 31 افراد ہلاک ہوئے تھے، جبکہ فوجی کارروائی میں 33 حملہ آور مارے گئے تھے۔ حملے کی ذمہ داری کالعدم بلوچ لبریشن آرمی نے قبول کی تھی۔

بلوچستان اور دیگر صوبوں کے درمیان فی الحال صرف دو ٹرینیں چلتی ہیں: جعفر ایکسپریس (کوئٹہ–پشاور) اور بولان میل (کوئٹہ–کراچی)، جس میں جعفر ایکسپریس روزانہ جبکہ بولان میل ہفتے میں صرف دو دن چلتی ہے۔