کراچی : سی ٹی ڈی کی کاروائی ، فائرنگ تبادلہ میں 3 دہشتگرد ہلاک

کراچی(ڈیلی اردو) کراچی کے علاقے منگھوپیر میں محکمہ انسداد دہشتگردی (سی ٹی ڈی) اور حساس اداروں نے مشترکہ آپریشن کرتے ہوئے ایک خفیہ ٹھکانے پر چھاپہ مارا، جس کے دوران ہونے والے شدید فائرنگ کے تبادلے میں تین دہشت گرد ہلاک ہوگئے۔

ذرائع کے مطابق سی ٹی ڈی انچارج راجا عمر خطاب نے بتایا کہ کارروائی خفیہ اطلاع پر کی گئی، جس میں کالعدم تنظیم کے کارندوں کی موجودگی کی نشاندہی کی گئی تھی۔ ہلاک ہونے والوں میں زعفران اور قدرت اللہ کی شناخت ہو گئی ہے جبکہ تیسرے دہشت گرد کی شناخت کا عمل جاری ہے۔ ہلاک دہشت گرد زعفران کے سر کی قیمت دو کروڑ روپے مقرر تھی۔

آپریشن کے بعد مکان سے بڑی مقدار میں دھماکا خیز مواد، دستی بم، ایس ایم جی رائفلیں اور دیگر اسلحہ برآمد کیا گیا۔ ہلاک دہشت گردوں کی لاشیں سول اسپتال منتقل کر دی گئی ہیں۔

پولیس حکام کا کہنا ہے کہ گھر میں موجود تمام دہشت گرد مارے جا چکے ہیں اور اب مکان کے مالک اور دیگر سہولت کاروں کے بارے میں تحقیقات کی جا رہی ہیں۔