کراچی: اورنگی ٹاؤن میں مشتعل نمازیوں کا خاتون ایس ایچ او پر حملہ، ایس ایچ او زخمی

کراچی (ڈیلی اردو) صوبہ سندھ کے دارالحکومت کراچی کے علاقے اورنگی ٹاؤن کے قریب بنارس میں پولیس اہلکار ایک بار پھر نمازیوں کے نشانہ پر، خاتون پولیس افسر جب اہلکاروں سمیت نماز جمعہ کے اجتماعات پر عائد پابندی پر عملدرآمد کرانے پہنچیں تو مبینہ طور پر نمازی ان پر حملہ آور ہوگئے۔

https://twitter.com/shamshad_bhutto/status/1248551088892108800?s=19

تفصیلات کے مطابق کراچی میں نماز جمعہ کے موقعے پر ایک بار پھر اس وقت کشیدگی پیدا ہوگئی جب اورنگی ٹاؤن کے علاقے بنارس کے قریب پیر آباد میں جامع مسجد حقانی سیوڑھی بابا مزار میں نمازِ جمعہ کا اجتماع منعقد ہوا۔ تاہم تھانہ پیرآباد کی خاتون ایس ایچ او شرافت خان نے موقعے پر پہنچ کر لوگوں کو جمع ہونے سے منع کیا۔

واضح رہے کہ سندھ حکومت کی جانب سے نماز جمعہ کے اجتماعات کو محدود کرنے کے لیے صوبے بھر میں جمعے کے روز دن 12 سے دوپہر ساڑھے 3 تک مکمل لاک ڈاؤن کی ہدایت کی گئی تھی۔

اسی سلسلے میں آج جب پولیس نے اورنگی ٹاؤن میں لاک ڈاؤن کی خلاف ورزی پر ایکشن لینے کی کوشش کی تو شہریوں نے مبینہ طور پر پولیس پر پتھراؤ کردیا جس کے نتیجے میں پیرآباد تھانے کی خاتون ایس ایچ او شرافت خان زخمی ہوگئیں۔

#Again in Karachi, but this time at #Banaras area, lady police officer reportedly attacked by worshipers when she along with cops reached to implement orders of Friday gatherings, #Vedio courtesy @FaizullahSwati @Godmade__ pic.twitter.com/lPMvovpBQF

— ???????? (@Info_Balochistn) April 10, 2020

واضح رہے کہ گزشتہ جمعہ کو بھی کراچی کے علاقے لیاقت آباد میں مسجد میں نماز جمعہ کی ادائیگی سے روکنے پر شہریوں نے مبینہ طور پر پولیس اہلکاروں پر حملہ کردیا تھا۔

اس واقعے کے بارے میں پولیس نے کہا تھا کہ لیاقت آباد نمبر 7 میں اہلکاروں پر اس وقت تشدد کیا جب انہوں نے غوثیہ مسجد کے امام کو نماز کے اجتماع کی پابندی کی خلاف ورزی پر گرفتار کرنے کی کوشش کی۔

پولیس نے دعویٰ کیا تھا کہ امام مسجد نے ہجوم کو اکسایا جس کے بعد انہوں نے پولیس اہلکاروں پر حملہ کیا جس سے بچنے کے لیے دو اہلکاروں نے مقامی شہری کے گھر پناہ لی۔

لیاقت آباد والے واقعے پر کراچی پولیس کے سربراہ غلام نبی میمن نے میڈیا کو بتایا تھا کہ لاک ڈاؤن کی خلاف ورزی اور پولیس اہلکاروں پر تشدد کرنے پر امام اور مسجد کے ٹرسٹیز سمیت 6 افراد کو گرفتار کرکے ان کے خلاف دہشت گردی اور دیگر دفعات کے تحت مقدمہ درج کر لیا گیا۔