کراچی سے انتہائی مطلوب دہشت گرد گرفتار، صحافیوں پر حملوں سمیت متعدد وارداتوں میں ملوث

کراچی (نمائندہ ڈیلی اردو ) صوبہ سندھ کے صوبائی دارالحکومت کراچی کے علاقے لیاری میں رینجرز اور محکمہ انسداد دہشت گردی (سی ٹی ڈی) نے مشترکہ کارروائی کرتے ہوئے کالعدم تنظیم سے تعلق رکھنے والے انتہائی مطلوب دہشت گرد اختر عرف اکو کو گرفتار کر لیا ہے۔

رینجرز ترجمان کے مطابق ملزم دہشت گردی کی متعدد وارداتوں میں ملوث رہا ہے، جس کے قبضے سے اسلحہ و بارود بھی برآمد کیا گیا ہے۔ اختر عرف اکو نے 2019 میں اپنے ساتھی فراز عرف گنج کے کہنے پر کالعدم تنظیم میں شمولیت اختیار کی تھی۔

ملزم نے دوران تفتیش انکشاف کیا کہ وہ حساس مقامات کی ریکی اور ویڈیوز بنانے میں بھی ملوث رہا ہے۔ 9 مارچ 2021 کو اختر اور فراز نے لیاری میں چینی شہریوں کی گاڑی پر فائرنگ کی تھی جس کے نتیجے میں چینی منیجر جیسن اور راہگیر خالد زخمی ہوئے تھے۔ اس واقعے کی ایف آئی آر تھانہ بغدادی میں درج ہے اور سی سی ٹی وی فوٹیج میں دونوں ملزمان کی شناخت ممکن ہوئی تھی۔

مزید انکشافات میں اختر نے بتایا کہ وہ حب چوکی میں صحافی اکرم ساجدی اور شاہد زہری کی ریکی اور ویڈیوز بنا کر کالعدم بی ایل ایف کے کمانڈر عبدالرحمٰن عرف عدنان عرف ڈیوڈ کو بھیجتا رہا ہے۔

10 اکتوبر 2021 کو حب چوکی میں شاہد زہری کی گاڑی پر مقناطیسی بم حملہ کیا گیا جس کے نتیجے میں وہ ہلاک اور دو افراد زخمی ہوئے۔ یکم نومبر 2021 کو صحافی اکرم ساجدی کو بھی اسی نوعیت کے حملے میں نشانہ بنایا گیا۔

رینجرز نے گرفتار ملزم کو اسلحہ سمیت سی ٹی ڈی کے حوالے کر دیا ہے۔ ترجمان نے عوام سے اپیل کی ہے کہ کسی بھی مشکوک سرگرمی کی اطلاع فوری طور پر رینجرز ہیلپ لائن 1101 یا ایس ایم ایس کے ذریعے دیں۔ اطلاع دینے والے کا نام صیغہ راز میں رکھا جائے گا۔