کراچی میں ایک اور پولیس اہلکار کی ٹارگٹ کلنگ

کراچی (ڈیلی اردو ) پاکستان کے صوبہ سندھ کے صوبائی حکومت کراچی کے علاقے گلشنِ معمار میں نامعلوم مسلح افراد کی فائرنگ سے پولیس کانسٹیبل صدام حسین ہلاک ہوگئے۔

ایس ایس پی ویسٹ طارق الہیٰ مستوئی کے مطابق کانسٹیبل ڈیوٹی کے لیے جا رہے تھے کہ کریم شاہ روڈ پر حملہ آوروں نے نشانہ بنایا۔ عینی شاہدین کے مطابق چار مشتبہ افراد سفید آلٹو کار میں سوار تھے۔

پولیس حکام نے واقعے کو بظاہر ٹارگٹ کلنگ قرار دیا ہے اور بتایا کہ ہر ممکن پہلو سے تحقیقات کی جا رہی ہیں۔ لاش کو قانونی کارروائی کے بعد عباسی شہید اسپتال منتقل کیا گیا۔

واضح رہے کہ رواں برس کراچی میں پولیس اہلکاروں پر حملوں میں ہلاک ہونے والوں کی تعداد چھ ہو گئی ہے۔ چند روز قبل سٹی پولیس چیف جاوید عالم اوڈھو نے بتایا تھا کہ اس سال اب تک پانچ اہلکار دہشت گردی کے واقعات میں ہلاک ہوئے ہیں، جن کی تفتیش محکمہ انسداد دہشت گردی کر رہا ہے۔