کراچی میں نامعلوم افراد کی فائرنگ سے پولیس اہلکار ہلاک

کراچی (ڈیلی اردو) صوبہ سندھ کے صوبائی دارالحکومت کراچی میں نامعلوم مسلح افراد کی فائرنگ سے ایک پولیس اہلکار ہلاک ہوگیا۔

پولیس حکام کے مطابق مقتول رات گئے شادی کی تقریب میں گیا تھا، سادہ لباس پولیس اہلکار عظیم اقبال موٹر سائیکل پر واپس آرہا تھا کہ اسے نامعلوم افراد نے فائرنگ کا نشانہ بنایا۔

پولیس حکام کا کہنا ہے کہ مقتول پولیس اہلکار سرجانی کا رہائشی تھا، مقتول کے پاس سے کوئی اشیاء نہیں چھینی گئی، مقتول اہلکار سے ایک 30 بور پستول، موبائل فون، پرس، نقد رقم اور موٹرسائیکل ملی ہے۔

پولیس کے مطابق جائے وقوعہ سے دو 30 بور پستول کےخول ملے ہیں، فارنزک ٹیم نے جائے وقوعہ سے شواہد اکٹھا کرکے تحقیقات شروع کردی ہے۔