کراچی میں پولیس افسر محمد خان ابڑو ٹارگٹڈ حملے میں ہلاک

کراچی (نمائندہ ڈیلی اردو) پاکستان کے صوبہ سندھ کے دارالحکومت کراچی کے بن قاسم ٹاؤن میں مسلح افراد نے فائرنگ کرکے پولیس افسر اسسٹنٹ سب انسپکٹر (اے ایس آئی) محمد خان ابڑو کو ہلاک کردیا۔ واقعے کی سی سی ٹی وی فوٹیج بھی منظر عام پر آگئی ہے۔

بن قاسم پولیس کے ایس ایچ او فیصل رفیق کے مطابق اے ایس آئی محمد خان ابڑو اپنی کار سے اپنے گھر کے باہر اتر رہے تھے کہ موٹرسائیکل سوار دو مسلح افراد نے ان پر فائرنگ کی اور فرار ہوگئے۔ شدید زخمی ہونے کے بعد انہیں جناح پوسٹ گریجویٹ میڈیکل سینٹر منتقل کیا گیا، جہاں ڈاکٹروں نے ان کی ہلاکت کی تصدیق کردی۔

ایس ایچ او نے بتایا کہ ابتدائی طور پر یہ واقعہ ٹارگٹ کلنگ معلوم ہوتا ہے، تاہم تحقیقات کے دوران یہ تعین کیا جائے گا کہ قتل دہشت گردی کے باعث ہوا یا ذاتی دشمنی کا نتیجہ تھا۔

مقتول اے ایس آئی محمد خان ابڑو قبل ازیں گھگھر پھاٹک پولیس پوسٹ کے انچارج رہ چکے تھے اور اس وقت اسٹیل ٹاؤن پولیس میں تعینات تھے۔

وزیراعلیٰ سندھ مراد علی شاہ نے واقعے کا نوٹس لیتے ہوئے آئی جی سندھ سے تفصیلی رپورٹ طلب کی اور قاتلوں کی فوری گرفتاری کی ہدایت جاری کی۔

سی ٹی ڈی حکام کے مطابق حملہ آوروں نے علاقے کی پہلے ریکی کی اور فائرنگ کے وقت ہیلمٹ اور ماسک پہن رکھے تھے۔ سی سی ٹی وی فوٹیج میں حملہ آوروں کی کارروائی واضح طور پر دیکھی جا سکتی ہے۔