کرغزستان: دہشت گردی کیخلاف مشترکہ تعاون وقت کی ضرورت ہے، پاکستان

بشکیک (ڈیلی اردو) کرغزستان کے دارالحکومت بشکیک میں شنگھائی تعاون تنظیم (ایس سی او) کے رکن ممالک کے وزرائے داخلہ اور پبلک سکیورٹی کے خصوصی اجلاس سے خطاب کرتے ہوئے وفاقی وزیرِ داخلہ محسن نقوی نے کہا ہے کہ خطے کو درپیش سکیورٹی چیلنجز سے نمٹنے کے لیے رکن ممالک کے درمیان مؤثر اور مربوط تعاون ناگزیر ہے۔

محسن نقوی نے کہا کہ دہشت گردی، منظم جرائم، منشیات کی سمگلنگ، سائبر کرائم اور دہشت گردوں کی مالی معاونت جیسے خطرات مشترکہ نوعیت کے ہیں اور ان سے نمٹنے کے لیے اجتماعی حکمت عملی ضروری ہے۔

انہوں نے کہا، ’’ہمارے چیلنجز مشترکہ ہیں، اس لیے ہماری کوششیں بھی اجتماعی اور ہم آہنگ ہونی چاہئیں۔ پرامن اور محفوظ ایس سی او خطہ ہماری مشترکہ منزل ہے۔‘‘

وفاقی وزیر داخلہ نے خبردار کیا کہ جرائم پیشہ نیٹ ورکس جدید ٹیکنالوجی، بالخصوص مصنوعی ذہانت اور ڈیجیٹل پلیٹ فارمز کا غلط استعمال کر رہے ہیں، جس کے باعث خطرات کی نوعیت مزید پیچیدہ ہو چکی ہے۔

محسن نقوی نے کہا کہ پاکستان شنگھائی اسپرٹ کے اصولوں، جن میں باہمی اعتماد، مساوی شراکت اور خودمختاری کا احترام شامل ہے، پر یقین رکھتا ہے اور دہشت گردی کے خلاف جنگ میں ملک نے بے مثال قربانیاں دی ہیں۔

انہوں نے کہا کہ پاکستان نے قومی ایکشن پلان کے تحت انٹیلیجنس کوآرڈینیشن، بارڈر مینجمنٹ اور اینٹی منی لانڈرنگ اقدامات کو مزید مضبوط بنایا ہے۔

وفاقی وزیر داخلہ نے رکن ممالک پر زور دیا کہ انٹیلیجنس شیئرنگ، مشترکہ خطرات کے تجزیے، آن لائن انتہاپسندی کے سدباب، سائبر انٹیلیجنس اور ڈیجیٹل فارنزکس کے شعبوں میں تعاون کو مزید وسعت دی جائے۔

انہوں نے کہا کہ منشیات کی سمگلنگ دہشت گردی کی مالی معاونت کا ایک بڑا ذریعہ ہے، اس لیے منشیات، آن لائن نیٹ ورکس اور کرپٹو کرنسی لین دین کے خلاف مشترکہ حکمت عملی اپنانا وقت کی ضرورت ہے۔

محسن نقوی نے بتایا کہ پاکستان کی اینٹی  نارکوٹکس فورس ایس سی او پلیٹ فارم پر فعال کردار ادا کر رہی ہے، جبکہ سرحدی سلامتی، جعلی دستاویزات، واچ لسٹ ہم آہنگی اور انسانی سمگلنگ کے خلاف تعاون بھی ناگزیر ہے۔

اپنے خطاب کے اختتام پر انہوں نے اعلان کیا کہ پاکستان 2027 میں اسلام آباد میں ہونے والے ایس سی او سربراہی اجلاس کی میزبانی کا منتظر ہے اور رکن ممالک کے وفود کا خیرمقدم کرنے کے لیے تیار ہے