کرم میں شیعہ سنی قبائل کے درمیان جھڑپیں جاری، 16 افراد ہلاک، 100 سے زائد زخمی

پاراچنار (ڈیلی اردو) صوبہ خیبر پختونخوا کے قبائلی ضلع کرم میں شیعہ سنی قبائل کے درمیان زمین کے تنازع پر گزشتہ چار دنوں سے جاری جھڑپوں میں 16 افراد ہلاک اور 100 زخمی ہوگئے ہیں۔

تفصیلات کے مطابق زمین کے تنازع پر جاری جھڑپوں کے دوران دونوں اطراف سے بھاری ہتھیاروں کا استعمال کیا جا رہا ہے، مخالفین نے پاراچنار سٹی اور صدہ ٹاؤن سے ایک دوسرے پر راکٹ اور میزائل داغے۔ گھروں میں میزائل لگنے سے متعدد بچے بھی زخمی ہو گئے۔

گزشتہ دو دنوں کے دوران ہنگو اور اورکزئی اضلاع کے قبائلی جرگہ دونوں قبائل کے درمیان جنگ بندی کروانے میں ناکام رہا ہے۔

پولیس اور ضلعی انتظامیہ کے مطابق بوشہرہ اور مالی خیل قبائل کے درمیان زمین کے تنازع پر یہ جھڑپیں گزشتہ چار دنوں سے جاری ہیں، انہوں نے کہا کہ ان جھڑپوں کے دوران 16 افراد ہلاک اور 100 سے زائد زخمی ہوچکے ہیں۔

حکام نے بتایا ہے کہ فائرنگ کا سلسلہ پیواڑ، تری منگل، بالشخیل، کنج علی زئی بوشہرہ، ڈنڈر، بالش خیل، حار کلے، پیواڑ اور شپینہ شگہ گیدو کے علاقوں میں بھی جاری رہا، مسلسل فائرنگ کی وجہ سے ان اضلاع میں ٹریفک کی روانی بھی متاثر رہی۔

ہسپتال ذرائع کے مطابق جھڑپوں کے باعث مین شاہراہ آمدورفت کے لئے بند ہے، جس سے اطراف کے علاقے کے لوگوں کو شدید مشکلات کا سامنا کرنا پڑ رہا ہے جبکہ گزشتہ روز سے بوشہرہ، مالی خیل، گدو، مقبل، کنج علیزئی، خار کلے، بالش خیل میں سیز فائر کیلئے انتظامیہ کی کوششیں جاری ہیں، تاحال انہیں کامیابی نہیں مل سکی۔

ذرائع کے مطابق حالات کافی کشیدگی اختیار کر چکے ہیں مگر تاحال فائرنگ کا سلسلہ بدستور جاری ہے۔

کرم کے ڈپٹی کمشنر عبداللہ محسود نے کہا ہے کہ ہنگو اور اورکزئی اضلاع کے مشترکہ قبائلی جرگہ کی جانب سے دونوں قبائل کے درمیان جنگ بندی اور صورتحال کو کنٹرول کرنے کی مسلسل کوشش کی جارہی ہے۔

واضح رہے جائیداد کے تنازع پر بوشہرہ میں شروع ہونیوالی جھڑپ مختلف علاقوں میں پھیل چکی ہے۔

کشیدہ صورتحال کے باعث مین شاہراہ آمدورفت کے لئے بند ہے۔