کرم: پاراچنار میں فوجی گاڑی کی ٹکر سے ایک بھائی ہلاک، دوسرا زخمی

پاراچنار (نمائندہ ڈیلی اردو) صوبہ خیبر پختونخوا کے قبائلی ضلع کرم کے ہیڈ کوارٹر پاراچنار کے قریب سیکورٹی فورسز کی گاڑی کی ٹکر سے موٹر سائیکل سوار مزدور ہلاک جبکہ دوسرا بھائی شدید زخمی ہوگیا۔

ڈسٹرکٹ ہسپتال پاراچنار کے سامنے مین روڈ پر لاش کے ہمراہ احتجاج کرتے ہوئے حادثہ متاثرین کے رشتہ داروں اور علاقے کے عمائدین نے کہا کہ دو مزدور بھائی کام ختم کرنے کے بعد موٹر سائیکل پر گھر جارہے تھے کہ پاراچنار کے قریب سیکورٹی فورسز کی گاڑی نے موٹر سائیکل کو ٹکر ماری جس سے عابد حسین نامی موٹر سائیکل سوار موقع پر ہی چل بسا جبکہ اس کا دوسرا بھائی شدید زخمی ہوگیا۔

مقررین کا کہنا تھا کہ حادثے کے بعد باوردی ڈرائیور نے گاڑی بھگا دی اور زخمی مزدور نے زخمی حالت میں تیس کلو میٹر تک موٹر سائیکل پر گاڑی رکوانے کیلئے پیچھا کیا۔

مقررین نے متاثرین کو انصاف کی فراہمی اور ڈرائیور کے خلاف کاروائی کا مطالبہ کیا۔

ڈی پی او کرم اور پاکستانی فوج کے کرنل واقعے کے بعد ہسپتال پہنچے اور کہا کہ واقعے کے خلاف تحقیقات کی جائے گی۔