کرم: پاراچنار میں نامعلوم افراد کی فائرنگ سے قبائلی رہنما شریف زمان بنگش ہلاک

اسلام آباد (ش ح ط) صوبہ خیبر پختونخوا کے قبائلی ضلع کرم میں نامعلوم افراد نے فائرنگ کرکے قبائلی رہنما اور تحریک انصاف کے نائب صدر کو ہلاک کردیا۔

قبائلی رہنما کی ہلاکت کا واقعہ منگل کی صبح ضلع کرم میں پیش آیا۔ ذرائع کے مطابق نامعلوم افراد نے غلام جان پل کے قریب قبائلی رہنما ملک شریف زمان بنگش پر فائرنگ کر دی جس سے وہ موقع پر ہی ہلاک ہوگئے۔

ذرائع کا یہ بھی کہنا تھا کہ قبائلی رہنما کا شمار حکومت کے حامیوں میں ہوتا تھا۔

ذرائع کے مطابق ملک شریف زمان بنگش ذاتی دشمنی پر اپنے ہی خاندان کے افراد کے ہاتھوں قتل ہوئے ہیں۔

واقعہ کے بعد حملہ آور موقع سے فرار ہونے میں کامیاب ہوگئے، اطلاع ملتے ہی پولیس کی بھاری نفری موقع پر پہنچ گئی اور لاش کو مقامی ہسپتال پہنچا دیا گیا جبکہ علاقے کی ناکہ بندی کر کے ملزمان کی تلاش شروع کر دی گئی۔ علاقے میں حالات انتہائی کشیدہ بتائے جاتے ہیں۔