کرم، لوئر دیر اور بنوں میں سیکورٹی فورسز پر 3 حملے، 4 حملہ آور ہلاک، 7 اہلکار زخمی

پاراچنار / دیر / بنوں (نمائندگان ڈیلی اردو) پاکستان کے صوبہ خیبر پختونخوا کے تین مختلف اضلاع میں سیکیورٹی فورسز کو شدت پسندی کا سامنا کرنا پڑا، جن میں چار حملہ آور ہلاک اور سات سیکیورٹی اہلکار زخمی ہو گئے ہیں۔

قبائلی ضلع کرم کی تحصیل بگن میں واقع مندوری پڑاؤ چیک پوسٹ پر پاکستانی طالبان سے منسلک شدت پسندوں کے ایک گروہ نے حملے کی کوشش کی۔ اطلاعات کے مطابق دو درجن سے زائد حملہ آوروں نے سنائپرز اور خودکار ہتھیاروں سے اہلکاروں کو نشانہ بنانے کی کوشش کی، تاہم سیکیورٹی اہلکاروں کی بروقت جوابی کارروائی میں کم از کم چار حملہ آور ہلاک ہو گئے، جبکہ کرم ملیشیا کے تین اہلکار معمولی زخمی ہوئے۔ علاقے میں کلیئرنس آپریشن تاحال جاری ہے۔

دوسری جانب ضلع لوئر دیر کی تحصیل لال قلعہ میدان کے علاقے سوری پاؤ میں واقع گل پولیس چیک پوسٹ پر آج رات 9 بج کر 15 منٹ پر نامعلوم حملہ آوروں نے دستی بم پھینکنے کے بعد فائرنگ کی، جس کے نتیجے میں ایلیٹ فورس کا اہلکار کانسٹیبل عالمگیر زخمی ہو گیا۔ حملے کے بعد فورسز نے جوابی فائرنگ کی اور علاقے کو گھیرے میں لے کر سرچ آپریشن شروع کر دیا گیا۔

ادھر ضلع بنوں میں تھانہ میریان ایک بار پھر کواڈ کاپٹر حملے کا نشانہ بنا۔ پولیس کے مطابق شدت پسندوں نے تھانے پر کواڈ کاپٹر کے ذریعے حملہ کیا جس میں دو اہلکار زخمی ہو گئے۔ کواڈ کاپٹر پولیس فائرنگ کے باوجود فرار ہونے میں کامیاب رہا۔ ذرائع کا کہنا ہے کہ حملے کا بنیادی ہدف تھانے پر نصب تھرمل کیمرہ تھا۔

سیکیورٹی ذرائع ان واقعات کو شدت پسند گروہوں کی منظم سرگرمیوں سے جوڑ رہے ہیں، جبکہ حکام نے ان علاقوں میں سیکیورٹی مزید سخت کر دی ہے۔