کرّم میں تین شیعہ مسافر فائرنگ سے ہلاک، پاراچنار میں احتجاج

واشنگٹن (ش ح ط) پاکستان کے صوبے خیبر پختونخوا کے قبائلی ضلع کرّم میں پولیس حکام کا کہنا ہے کہ جمعے کے روز نامعلوم مسلح افراد نے فائرنگ کر کے تین شیعہ مسافروں کو ہلاک کر دیا۔

پولیس کے مطابق فائرنگ کا واقعہ علاقے بگن میں اس وقت پیش آیا جب پاراچنار سے پشاور جانے والے افراد کو نشانہ بنایا گیا۔

تاہم مقامی ذرائع کا کہنا ہے کہ علیزئی سے رات کے وقت دریا کے راستے ٹل جانے والے افراد پر فائرنگ کی گئی۔

ریسکیو ذرائع کے مطابق فائرنگ کے نتیجے میں ہلاک ہونے والے تینوں افراد کی لاشیں دریائے کرم سے برآمد کی گئی ہیں۔ مقامی ذرائع نے پولیس کو بتایا کہ ہلاک ہونے والوں میں مزار علی، طاہر علی اور سفر علی شامل ہیں، جو پشاور جانے کے لیے گھروں سے روانہ ہوئے تھے۔

گزشتہ سات ماہ سے سڑک کی بندش کے باعث ہزاروں افراد علاقے میں محصور ہیں، جس کے باعث لوگ مجبوراً دور دراز اور خطرناک راستوں سے علاقے سے نکلنے کی کوشش کر رہے ہیں۔

واقعے کے خلاف پاراچنار میں احتجاجی مظاہرہ کیا گیا، جس میں مظاہرین نے واقعے کو امن معاہدے کی کھلی خلاف ورزی قرار دیتے ہوئے اس کی شدید مذمت کی۔

یاد رہے کہ کرّم میں جاری شیعہ سنی فرقہ وارانہ جھڑپوں کے نتیجے میں اب تک کم از کم 300 افراد ہلاک اور 400 سے زائد زخمی ہو چکے ہیں۔