کرک میں سی ٹی ڈی اور پولیس کا مشترکہ آپریشن، دہشت گردوں کے ٹھکانے تباہ

کرک (ڈیلی اردو) صوبہ خیبر پختونخوا کے ضلع کرک میں  پولیس اور انسدادِ دہشت گردی ونگ (سی ٹی ڈی) نے امان کوٹ، ٹیری کے پہاڑی سلسلوں اور مضافاتی علاقوں میں بڑے پیمانے پر سرچ اینڈ اسٹرائیک آپریشن کیا، جس میں بھاری نفری جدید اور مہلک ہتھیاروں سے لیس تھی۔ 

یہ آپریشن امانکوٹ میں ایف سی اہلکاروں پر حالیہ دہشت گرد حملے اور علاقے میں دہشت گردوں کی سرگرمیوں کی اطلاعات کے بعد شروع کیا گیا، جس کا مقصد امن دشمن عناصر کا مکمل خاتمہ اور عوام کے جان و مال کا تحفظ ہے۔

کارروائی کے دوران ایف سی اہلکاروں پر حملے میں ملوث دہشت گرد تنظیم کے تین اہم کارندوں کے خلاف سخت ایکشن لیا گیا۔ پولیس اور سی ٹی ڈی نے دہشت گردوں کے ٹھکانوں پر ہلہ بولتے ہوئے پہاڑوں میں قائم محفوظ مورچے تباہ کر دیے، جبکہ سہولت کاروں کے گھروں کو مسمار اور نذرِ آتش کیا۔ حکام کا کہنا ہے کہ پہاڑی اور دور افتادہ علاقوں تک دہشت گردوں کا پیچھا جاری ہے تاکہ انہیں قانون کے شکنجے میں لا کر قانون کی بالادستی قائم کی جا سکے۔

کرک پولیس نے واضح کیا کہ ضلع میں امن و امان کے لیے دہشت گردوں اور ان کے سہولت کاروں کے خلاف گھیرا مزید تنگ کیا جا رہا ہے، اور کسی کو بھی قانون سے بالاتر رہنے کی اجازت نہیں دی جائے گی۔ بلا امتیاز اور فیصلہ کن کارروائیوں کا سلسلہ جاری رہے گا تاکہ عوامی سلامتی ہر صورت یقینی بنائی جا سکے۔