کرک: پاکستانی طالبان کی فائرنگ، ایس ایچ او عمر نواز سمیت 3 پولیس اہلکار ہلاک

کرک (نمائندہ ڈیلی اردو) پاکستان کے شورش زدہ صوبے خیبرپختونخوا کے ضلع کرک میں پاکستانی طالبان کی فائرنگ کے نتیجے میں تھانہ بانڈہ کے ایس ایچ او عمر نواز سمیت 3 پولیس اہلکار ہلاک ہوگئے۔

واقعہ کرک کی تحصیل بانڈہ کے علاقے احمدی بانڈہ میں پیش آیا، جہاں ایس ایچ او عمر نواز اپنی گاڑی میں گشت پر تھے۔ احمدی بانڈہ پیٹرول پمپ کے قریب مسلح موٹر سائیکل سوار دہشت گردوں نے اندھا دھند فائرنگ کردی، جس کے نتیجے میں ایس ایچ او عمر نواز اور ان کے 2 سپاہی ہلاک ہوگئے۔ مسلح موٹر سائیکل سوار موقع سے فرار ہونے میں کامیاب ہوگئے۔

واقعے کی اطلاع ملنے پر ڈی پی او شہباز الٰہی بھاری نفری کے ہمراہ جائے وقوعہ پہنچ گئے اور علاقے کو گھیرے میں لے لیا۔ پولیس نے قاتلوں کی گرفتاری کے لیے سرچ آپریشن شروع کردیا ہے۔