کوئٹہ اور خضدار میں فائرنگ کے واقعات، دو پولیس اہلکاروں سمیت چھ افراد ہلاک

کوئٹہ(ڈیلی اردو) بلوچستان کے مختلف علاقوں میں تشدد کے دو الگ واقعات کے دوران دو پولیس اہلکاروں سمیت مجموعی طور پر چھ افراد ہلاک ہوگئے۔

پہلا واقعہ ضلع خضدار کی تحصیل وڈھ کے علاقے آڑنجی میں پیش آیا، جہاں پولیس کے مطابق نامعلوم مسلح افراد نے حملہ کیا۔ آڑنجی پولیس اسٹیشن کے ایس ایچ او عبدالفتاح رند نے واقعے کی تصدیق کرتے ہوئے بتایا کہ حملہ پولیس اسٹیشن سے تقریباً 100 کلومیٹر دور ہوا، جس کے نتیجے میں چار افراد موقع پر ہلاک ہوئے۔

پولیس کے مطابق حملہ آور ایک پولیس اہلکار کو بھی اپنے ساتھ لے گئے، تاہم کچھ فاصلے پر لے جانے کے بعد اسے بھی قتل کردیا گیا۔ حکام کے مطابق واقعے میں ہلاک اور زخمی ہونے والے افراد کی شناخت کرلی گئی ہے، جبکہ ہلاک ہونے والوں میں محکمہ صحت کا ایک ملازم بھی شامل ہے۔

واقعے کے بعد پولیس کی بھاری نفری علاقے کی جانب روانہ کردی گئی۔ حکام کے مطابق حملے کی ذمہ داری کالعدم بلوچ لبریشن آرمی (بی ایل اے) نے قبول کی ہے۔

ایک سینیئر سرکاری افسر کے مطابق مذکورہ علاقے میں گزشتہ سال پیپلز پارٹی کے رہنما اور جھالاوان عوامی پینل کے سربراہ میر شفیق الرحمان مینگل کے بھائی عطاالرحمان مینگل کو بھی ایک حملے میں ہلاک کیا گیا تھا، جس کے بعد علاقے میں پولیس اہلکار تعینات کیے گئے تھے۔

دوسری جانب کوئٹہ شہر میں شہید عبدالخالق پولیس اسٹیشن کی حدود میں نامعلوم موٹر سائیکل سواروں نے پولیس اہلکار محمد عباس کو نشانہ بنایا، جس کے نتیجے میں وہ ہلاک ہوگئے۔ پولیس ترجمان کے مطابق واقعے کے محرکات فوری طور پر معلوم نہیں ہوسکے۔

محمد عباس کی نماز جنازہ پولیس لائنز میں ادا کی گئی، جس میں آئی جی بلوچستان پولیس محمد طاہر خان سمیت دیگر پولیس افسران اور اہلکاروں نے شرکت کی۔

رپورٹ کے مطابق خضدار میں پیش آنے والا واقعہ ایک ایسے علاقے میں ہوا جہاں ماضی میں بھی پرتشدد حملے ہوچکے ہیں۔ گزشتہ سال میر شفیق الرحمان مینگل کے بھائی عطاالرحمان مینگل کو نشانہ بنایا گیا تھا، جبکہ رواں سال جولائی میں خضدار میں میر شفیق الرحمان مینگل کی رہائش گاہ پر خودکش حملہ بھی کیا گیا تھا، جس میں وہ محفوظ رہے تاہم ان کے متعدد محافظ ہلاک ہوئے تھے۔