کوئٹہ: خودکش حملے کا ماسٹر مائنڈ ڈاکٹر عثمان قاضی سمیت بی ایل اے کے 3 دہشت گرد گرفتار

کوئٹہ (نمائندہ  ڈیلی اردو) پاکستان کے قانون نافذ کرنے والے اداروں نے کوئٹہ ریلوے اسٹیشن پر خودکش حملے کے سہولت کار کی نشاندہی پر کارروائی کرتے ہوئے بیوٹمز یونیورسٹی کے پی ایچ ڈی پروفیسر سمیت کالعدم بلوچ لبریشن آرمی (بی ایل اے) کے تین دہشت گردوں کو گرفتار کر لیا ہے۔ گرفتار ملزمان جشنِ آزادی کی تقریبات کے دوران خودکش حملے اور بم دھماکوں کی منصوبہ بندی کر رہے تھے۔

سیکیورٹی ذرائع کے مطابق جولائی کے آخری ہفتے میں اطلاع ملی تھی کہ بی ایل اے کے دہشت گرد کوئٹہ سمیت بلوچستان کے مختلف اضلاع میں بڑے حملوں کی منصوبہ بندی کر رہے ہیں۔ اس اطلاع پر صوبے بھر میں کارروائیاں تیز کر دی گئیں۔

ذرائع نے بتایا کہ 11 اگست کو کوئٹہ سے ایک خودکش بمبار کو گرفتار کیا گیا، جس نے تفتیش کے دوران انکشاف کیا کہ اسے بیوٹمز یونیورسٹی کے پروفیسر ڈاکٹر محمد عثمان قاضی نے تیار کیا تھا اور وہ دیگر نوجوانوں کو بھی خودکش حملوں کے لیے تیار کر رہا ہے۔

گرفتار بمبار کی نشاندہی پر سیکیورٹی فورسز نے کارروائی کرتے ہوئے ڈاکٹر عثمان قاضی کو ان کے بھائی جبران قاضی سمیت افنان ٹاؤن سے گرفتار کر لیا، جبکہ مزید ایک اور بمبار بھی حراست میں لے لیا گیا۔ گرفتار دہشت گردوں نے اعتراف کیا ہے کہ وہ بی ایل اے کے مجید بریگیڈ کے لیے کام کر رہے تھے اور کوئٹہ سمیت مختلف شہروں میں یومِ آزادی کی تقریبات کو نشانہ بنانے کا منصوبہ رکھتے تھے۔

ذرائع کے مطابق ملزم نے یہ بھی انکشاف کیا کہ وہ 9 نومبر 2024 کو کوئٹہ ریلوے اسٹیشن پر ہونے والے خودکش حملے میں سہولت کاری کر چکا ہے۔

سیکیورٹی حکام کا کہنا ہے کہ گرفتار ملزمان سے مزید تحقیقات جاری ہیں، جن سے مزید اہم انکشافات اور گرفتاریاں متوقع ہیں۔