کوئٹہ میں پولیس اہلکار کی جوابی فائرنگ سے دہشتگرد ہلاک، اہلکار سمیت 2 افراد زخمی

کوئٹہ (ڈیلی اردو) بلوچستان کے صوبائی دارالحکومت کوئٹہ کے علاقہ سریاب میں دہشت گردوں کی فائرنگ سے ٹریفک کانسٹیبل سمیت 2 افراد زخمی ہو گئے جبکہ پولیس کی جوابی فائرنگ سے ایک دہشت گرد مارا گیا اور اسکا ساتھی فرار ہو گیا۔

سریاب کے علاقے کلی ابڑو میں آج شام افطاری کے وقت دو نامعلوم دہشت گردوں نے ٹریفک کانسٹیبل عبدالمالک پر فائرنگ کی جس کے نتیجے میں وہ زخمی ہو گئے، ایک راہگیر بھی فائرنگ کی زد میں آ گیا۔

دونوں زخمیوں کو فوری طور پر علاج کے لیے سول ہسپتال کوئٹہ منتقل کر دیا گیا جہاں ان کی حالت خطرے سے باہر بتائی گئی ہے۔ ایس ایچ او سریاب جو علاقے میں گشت کر رہے تھے۔

اطلاع ملتے ہی پولیس پارٹی کے ہمراہ جائے وقوعہ پر پہنچ گئے اور دہشت گردوں پر فائرنگ کر دی جس کے نتیجے میں ایک دہشت گرد مارا گیا جبکہ اس کا ساتھی زخمی حالت میں فرار ہونے میں کامیاب ہو گیا۔

واقعے کے بعد پولیس اور ایف سی کی بھاری نفری جائے وقوعہ پہ پہنچ گئی ہے اور تحقیقات شروع کر دی ہے۔ ڈی آئی جی کوئٹہ عبدالرزاق چیمہ کے مطابق واقعہ کے بعد علاقے کی ناکہ بندی کر کے مشکوک زخمی دہشت گرد کی تلاش شروع کر دی گئی ہے۔

آخری اطلاعات تک کوئی گرفتاری عمل میں نہیں آئی تھی اور نہ ہی کسی گروپ نے اس واقعے کی ذمہ داری قبول کی ہے۔