کوہاٹ میں گولڈ مائنگ چیک پوسٹ پر حملہ، 2 سیکورٹی گارڈز سمیت 3 افراد ہلاک

کوہاٹ (نمائندہ ڈیلی اردو) پاکستان کے صوبہ خیبرپختونخوا کے ضلع کوہاٹ کے علاقہ شکردرہ میں نواحی گاؤں رحمان آباد میں واقع گولڈ مائنگ چیک پوسٹ پر مسلح افراد کے حملے میں دو سیکورٹی گارڈز سمیت تین افراد ہلاک ہو گئے جبکہ جوابی کارروائی میں ایک حملہ آور بھی مارا گیا۔

ایس ایچ او اصف حیات کے مطابق نامعلوم مسلح افراد نے اچانک چیک پوسٹ پر فائرنگ شروع کر دی، جس کے نتیجے میں سیکورٹی اہلکاروں اور دیگر افراد زخمی ہو گئے۔ حملے کے دوران کراس فائرنگ کے دوران ایک حملہ آور بھی مارا گیا۔ 

پولیس نے لاشوں کو اسپتال منتقل کر دیا ہے۔ ایس ایچ او کا کہنا ہے کہ ہلاک ہونے والے سیکورٹی گارڈ نجی کمپنی کے ملازم تھے۔

واضح رہے کہ گزشتہ روز بھی شکردرہ کے علاقے مکڑ شریف میں مسلح طالبان نے سونا نکالنے والے مزدوروں کی ٹینٹ، سامان اور ایک گاڑی کو آگ لگا دی تھی، جس سے علاقے میں خوف و ہراس پھیل گیا ہے۔

پولیس اور مقامی حکام کا کہنا ہے کہ علاقے میں بڑھتے ہوئے حملوں کے پیش نظر اضافی نفری تعینات کی جا رہی ہے تاکہ مزید واقعات کو روکا جا سکے۔