کوہاٹ: ‏درہ آدم خیل سے طالبان کے ہاتھوں قتل 16 مزدورں کی لاشیں مل گئیں

درہ آدم خیل (ڈیلی اردو) صوبہ خیبر پختونخوا کے ضلع کوہاٹ کے قبائلی علاقے درہ آدم خیل میں ایک اجتماعی قبر سے 16 افراد کی لاشیں برآمد ہوئی ہیں۔

سرکاری ذرائع کے مطابق اجتماعی قبر سے لاشوں کی برآمدگی کے بعد متعلقہ اداروں نے تحقیقات بھی شروع کر دی ہیں۔ تمام افراد کی نماز جنازہ شانگلہ میں ادا کی جائے گی۔

پولیس ذرائع کے مطابق ان تمام افراد کا تعلق خیبر پختونخوا کے کے ضلع شانگلہ کی تحصیل الپوری سے ہے۔ متعلقہ افراد کو 2011ء میں طالبان دہشت گردوں نے قبائلی ضلع خیبر کے علاوق تورچھپر سے اغوا کیا گیا تھا۔ قتل کئے گئے یہ تمام افراد کان کن تھے۔

https://twitter.com/ShabbirTuri/status/1380519712493203459?s=19

پولیس کا کہنا ہے کہ 2011ء میں درہ آدم خیل میں طالبان سرگرم تھے۔ مغویوں کے لواحقین گزشتہ دس سالوں سے اپنے پیاروں کی تلاش میں تھے۔ گزشتہ روز مقامی لوگوں کو کچھ باقیات ملی تھیں۔

بیان میں کہا گیا ہے کہ باقیات ملنے پر پولیس اور ریسکیو کے اداروں کو مطلع کیا گیا تھا۔ جائے وقوعہ سے سولہ افراد کی باقیات ملی ہیں، مزید باقیات کیلئے کھدائی جاری ہے۔

کوئلہ کان مزدوروں کے حقوق کیلئے کام کرنے والی مقامی تنظیم “سموا” کے ترجمان سرفراز خان کے مطابق مزدوروں کی لاشوں کو آبائی علاقے شانگلہ منتقل کیا جائے گا اور اجتماعی جنازہ ادا کیا جائے گا۔

سموا کی ٹیم پاکستان تحریک انصاف کے ڈویژنل سنئیر نائب صدر حاجی سدید الرحمن، ضلعی صدر وقار احمد خان، سابق ممبر صوبائی اسمبلی محمد رشاد خان موقع پر موجود ہیں جبکہ انجینئر امیر مقام بھی پشاور سے کوھاٹ کے لئے روانہ چکے۔

مقامی خبر رساں ایجنسی ٹی این این کی جانب سے رابطہ پر سموا کے عہدیدار عابد یار نے بتایا کہ کان کنوں کے حالات انتہائی ابتر ہیں اور ان کے ساتھ جاری سلوک غیرانسانی ہے۔