کوہاٹ، ہنگو، اورکزئی و لوئرکرم میں گرینڈ آپریشن؛ 15 دہشتگرد ہلاک، درجنوں زخمی

پشاور(ڈیلی اردو)  سیکیورٹی فورسز نے کوہاٹ، ہنگو، اورکزئی اور لوئر کرم کے پہاڑی و سرحدی علاقوں میں دہشتگردوں کے خلاف بڑے پیمانے پر گرینڈ آپریشن کیا ہے، جس کے دوران شدت پسندوں کے متعدد ٹھکانے تباہ جبکہ 15 دہشتگرد ہلاک اور کئی زخمی ہو گئے۔

ریجنل پولیس آفیسر کوہاٹ، عباس مجید مروت کے مطابق شدت پسندوں کے خفیہ ٹھکانوں پر گن شپ ہیلی کاپٹروں کے ذریعے شیلنگ کی گئی، جس کے نتیجے میں چھپری، کنڈائو، زرگری، شناوڑی، نریاب اور گردونواح کے علاقوں میں دہشتگردوں کو شدید نقصان پہنچا۔

ان کے مطابق جنگی ہیلی کاپٹروں سے فرار ہوتے دہشتگردوں کو پہاڑی جنگلات کی طرف بھاگتے ہوئے دیکھا گیا، جن کا تعاقب کیا گیا۔ 200 سے زائد سیکیورٹی اہلکار اس مشترکہ آپریشن میں حصہ لے رہے ہیں۔

آر پی او کوہاٹ نے بتایا کہ ضلع کرک کے نو گو ایریا کوہ میدان میں بھی سرچ آپریشن جاری ہے، جہاں سے دہشتگردوں کا صفایا کر دیا گیا ہے۔ پچھلے دس روز میں جاری آپریشن کے دوران نہ صرف کئی اہم پناہ گاہیں تباہ ہوئیں بلکہ شدت پسندوں کے نیٹ ورک کو بھی شدید دھچکا لگا ہے۔

سیکیورٹی اداروں کا کہنا ہے کہ یہ آپریشن علاقے میں دیرپا امن کے قیام کے لیے جاری رہے گا۔