گوجرانوالہ میں کھیت سے مشتبہ بھارتی میزائل کا ملبہ برآمد

اسلام آباد (ڈیلی اردو رپورٹ) ضلع گوجرانوالہ کے نواحی علاقے کے ایک کھیت سے مشتبہ بھارتی میزائل یا راکٹ کا ملبہ برآمد ہوا ہے۔ مقامی افراد کے مطابق، دھماکے کی آواز سنائی دی جس کے بعد پاکستان آرمی کے اہلکار موقع پر پہنچے اور علاقے کو گھیرے میں لے لیا۔

ویڈیو اور تصاویر میں دکھائی دینے والا ملبہ ڈیزائن اور ساخت کے لحاظ سے کسی میزائل یا راکٹ سسٹم کا حصہ معلوم ہوتا ہے، نہ کہ کوئی ڈرون۔ خاص طور پر پچھلی جانب موجود فِنز (پر نما پرزے) اس جانب اشارہ کرتے ہیں کہ یہ ممکنہ طور پر زمین سے زمین پر مار کرنے والا راکٹ یا میزائل ہو سکتا ہے

ماہرین کے مطابق کسی راکٹ آرٹلری سسٹم (جیسے MLRS) کا فائر کیا گیا ناکام یا بھٹکا ہوا میزائل ہو سکتا ہے۔ یا پھر کوئی ایسا فضائی ہتھیار جو مکمل طور پر نہ پھٹ سکا ہو۔۔

ماہرین کا کہنا ہے کہ یہ ملبہ ممکنہ طور پر کسی عسکری مشق، غلطی یا تکنیکی خرابی کے باعث شہری علاقے میں آ گرا۔ سیکیورٹی اداروں نے ملبے کو قبضے میں لے کر تحقیقات شروع کر دی ہیں، جبکہ بم ڈسپوزل اسکواڈ نے جائے وقوعہ کو کلیئر کر دیا ہے۔

واقعے کی مزید تحقیقات جاری ہیں۔