ہنگو: پولیس اور دہشتگردوں کے درمیان جھڑپ ، ایک دہشتگرد ہلاک

ہنگو(ڈیلی اردو) ضلع ہنگو کے علاقے طورہ وڑی میں پولیس اور دہشتگردوں کے درمیان شدید جھڑپ کے دوران ایک دہشتگرد ہلاک ہوگیا، جبکہ پولیس اہلکار محفوظ رہے۔ جھڑپ کے دوران دہشتگردوں نے پولیس گاڑیوں پر بھاری اسلحہ سے فائرنگ کی، جس سے گاڑیوں کو جزوی نقصان پہنچا۔

پولیس ذرائع کے مطابق، واقعہ اس وقت پیش آیا جب گرفتار دہشتگرد کو لے کر پولیس باقی دہشتگردوں کے ٹھکانے کی نشاندہی کے لیے جا رہی تھی۔ اس دوران پہاڑی علاقے سے دہشتگردوں نے پولیس قافلے پر حملہ کیا۔ تاہم پولیس کی جوابی فائرنگ سے حملہ آور منتشر ہو کر پہاڑیوں کی طرف فرار ہو گئے۔

پولیس کا کہنا ہے کہ اہلکاروں کی بروقت جوابی کارروائی سے بڑا جانی نقصان ٹل گیا اور ایک دہشتگرد مارا گیا، جبکہ باقی دہشتگردوں کی تلاش میں علاقے میں سرچ آپریشن جاری ہے۔