یمنی فوج نے حیس کو حوثیوں کے قبضہ سے آزاد کردیا، مکمل کنٹرول کا اعلان

الحدیدہ(ڈیلی اردو) یمن کی حکومتی فورسز اور مشترکہ فوجی دستوں نے صوبہ الحدیدہ کے جنوبی علاقے میں واقع حیس ڈائریکٹوریٹ پر مکمل کنٹرول حاصل کرنے کا اعلان کردیا ہے۔

یمنی فوج کے ایک فوجی ذریعے کے مطابق حیس شہر پہلے ہی حکومتی فورسز کے کنٹرول میں تھا، تاہم ڈائریکٹوریٹ کے دیہی علاقوں کے بعض حصے حوثی باغیوں کے قبضے میں تھے۔ تازہ کارروائی کے دوران ان علاقوں کو بھی دوبارہ اپنے کنٹرول میں لے کر مکمل طور پر محفوظ بنا لیا گیا ہے۔

فوجی ذریعے کے مطابق فورسز نے مفرق البرح کے اطراف کے علاقوں پر بھی دوبارہ کنٹرول حاصل کیا اور وہاں سے حوثی باغیوں کے ٹھکانوں کی جانب پیش قدمی کی۔ کارروائی کے دوران حوثی جنگجوؤں کی پسپائی اور فرار کی اطلاعات موصول ہوئیں جبکہ فوجی ذریعے نے ان کے درجنوں افراد کے ہلاک اور زخمی ہونے کا دعویٰ کیا ہے۔

یمنی فورسز نے حیس کے مکمل کنٹرول کے بعد علاقے میں سکیورٹی اقدامات مزید مضبوط کرنے اور نئے حاصل کیے گئے مقامات پر اپنی پوزیشنیں مستحکم کرنے کا عمل جاری رکھنے کا اعلان کیا ہے۔

حیس کی جغرافیائی اہمیت اس لیے بھی نمایاں ہے کہ یہ الحدیدہ، تعز اور اب کے درمیان رابطے کے اہم راستوں سے جڑا ہوا علاقہ ہے۔