آبنائے ہرمز میں تجارتی جہاز پر حملہ، 12 افراد زخمی، 11 بھارتی شہری شامل

عمان(ڈیلی اردو) آبنائے ہرمز سے گزرنے والے پاناما کے پرچم بردار تجارتی جہاز ایم ٹی آن پیس کو عمان کے ساحل کے قریب ایک مقذوف سے نشانہ بنایا گیا، جس کے نتیجے میں عملے کے 12 افراد زخمی ہوگئے۔ زخمیوں میں 11 بھارتی شہری شامل ہیں۔

بھارتی وزارت خارجہ کے مطابق جہاز پر مجموعی طور پر 19 افراد سوار تھے، جن میں 17 بھارتی شہری شامل تھے۔ حملے کے بعد عمانی حکام کی مدد سے زخمی عملے کو بحفاظت نکال کر عمان کے شہر خصب منتقل کیا گیا، جہاں انہیں طبی امداد فراہم کی جارہی ہے۔

بھارت نے واقعے کی مذمت کرتے ہوئے خطے میں تجارتی جہازوں اور ملاحوں کو نشانہ بنائے جانے پر شدید تشویش کا اظہار کیا ہے۔ بھارتی وزارت خارجہ نے حملے کی ذمہ داری کسی فریق پر عائد نہیں کی اور بحری آمدورفت کو لاحق خطرات کے پیش نظر ایسے حملوں کو فوری طور پر روکنے کا مطالبہ کیا ہے۔

عالمی میڈیا رپورٹس کے مطابق یہ واقعہ ایسے وقت پیش آیا ہے جب آبنائے ہرمز اور اس کے اطراف تجارتی جہازوں کو مسلسل سکیورٹی خطرات کا سامنا ہے۔ حالیہ عرصے میں متعدد ٹینکروں کو پیش آنے والے واقعات کے باعث خطے میں بحری نقل و حرکت اور توانائی کی عالمی ترسیل کے حوالے سے خدشات میں اضافہ ہوا ہے۔

آبنائے ہرمز دنیا کی اہم ترین توانائی گزرگاہوں میں شمار ہوتی ہے اور یہاں سے عالمی تیل اور مائع قدرتی گیس کی ایک بڑی مقدار گزرتی ہے۔ ماہرین کے مطابق اس اہم بحری راستے میں کسی بھی طویل رکاوٹ کے عالمی توانائی کی قیمتوں اور بین الاقوامی تجارت پر اثرات مرتب ہوسکتے ہیں۔

تاحال اس تازہ حملے کی ذمہ داری کسی گروہ یا ملک نے قبول نہیں کی، جبکہ واقعے کی مزید تحقیقات جاری ہیں۔