نیویارک میں امریکی نمائندے سے ملاقات پر ایران میں تنازع، وزیر خارجہ عراقچی کے خلاف پارلیمانی کارروائی کی درخواست

تہران(ڈیلی اردو) تہران میں امریکی نمائندے اسٹیو وٹکوف سے ملاقات کے معاملے پر ایران کے وزیر خارجہ عباس عراقچی کو سیاسی دباؤ کا سامنا ہے۔ ایرانی خبر رساں ادارے تسنیم کے مطابق پارلیمنٹ میں عراقچی سے پوچھ گچھ اور انہیں جواب دہ بنانے کی درخواست جمع کرائی گئی ہے، تاہم منگل تک یہ درخواست پارلیمنٹ کی صدارت کو باضابطہ طور پر پیش نہیں کی گئی تھی۔

رپورٹ کے مطابق پارلیمانی رکن محمد رشیدی نے تصدیق کی کہ وزیر خارجہ کے خلاف استجواب کی درخواست درج کی گئی ہے، تاہم اس کے محرکات کی باضابطہ وضاحت سامنے نہیں آئی۔ یہ پیش رفت عراقچی کی جانب سے اقوام متحدہ کی جنرل اسمبلی کے اجلاس کے موقع پر نیویارک میں امریکی خصوصی نمائندے اسٹیو وٹکوف سے ملاقات کے بعد سامنے آئی ہے۔

ایرانی سخت گیر حلقوں نے اس ملاقات پر اعتراض کرتے ہوئے الزام عائد کیا ہے کہ عراقچی نے متعلقہ پالیسی ساز اداروں سے پیشگی اجازت یا مکمل رابطے کے بغیر امریکی نمائندے سے براہ راست ملاقات کی۔ ایران کے پاسداران انقلاب سے وابستہ تسنیم نے بھی اس رابطے پر سخت سوالات اٹھائے اور وزیر خارجہ سے وضاحت طلب کرنے کی حمایت کی ہے۔

ایرانی حکام کے بیانات میں ملاقات کی نوعیت کے حوالے سے مختلف پہلو سامنے آئے ہیں۔ ایرانی سرکاری ذرائع کے مطابق وٹکوف سے رابطے کا مقصد آبنائے ہرمز کھولنے سے متعلق تہران کی شرائط امریکی فریق تک پہنچانا تھا، جبکہ امریکی صدر ڈونلڈ ٹرمپ نے اس ملاقات کو مذاکرات میں پیش رفت کے امکان سے جوڑا تھا۔

عالمی میڈیا کے مطابق نیویارک میں ہونے والے امریکی اور ایرانی رابطوں میں آبنائے ہرمز کی بحالی، جنگ بندی، پابندیوں اور منجمد ایرانی اثاثوں سمیت متعدد اہم معاملات زیر بحث آئے۔ دوسری جانب ایران کے اندر ہی عراقچی کے طرزِ مذاکرات پر اختلافات نمایاں ہوئے ہیں، جبکہ ایرانی پارلیمنٹ کے بعض ارکان نے ان سے ملاقات کے اختیار اور پالیسی فریم ورک سے متعلق وضاحت مانگی ہے۔

رپورٹس کے مطابق یہ معاملہ ایسے وقت میں سامنے آیا ہے جب واشنگٹن اور تہران کے درمیان سفارتی رابطے جاری رکھنے کی کوششیں مشکلات کا شکار ہیں۔ امریکی انتظامیہ نے ایران پر دباؤ بڑھانے کے لیے نئی پابندیوں کا اعلان بھی کیا ہے، جس سے دونوں ملکوں کے درمیان مذاکرات کے امکانات مزید پیچیدہ ہوگئے ہیں۔