آبنائے ہرمز میں تین آئل ٹینکروں کے بارودی سرنگوں سے ٹکرانے کا ایرانی دعویٰ، ایک اور جہاز میں آگ لگنے کی اطلاع

آبنائے ہرمز (ڈیلی اردو) ایران کے پاسدارانِ انقلاب نے دعویٰ کیا ہے کہ گزشتہ 24 گھنٹوں کے دوران تین آئل ٹینکر آبنائے ہرمز کے جنوبی حصے میں سمندری بارودی سرنگوں سے ٹکرا کر دھماکوں اور آگ کی زد میں آ گئے۔ ایرانی حکام کے مطابق یہ جہاز مبینہ طور پر مقررہ ضوابط کی خلاف ورزی کرتے ہوئے غیر مجاز بحری راستے سے گزرنے کی کوشش کر رہے تھے۔ پاسدارانِ انقلاب کا کہنا ہے کہ ٹینکروں نے اپنے ریڈار اور نیویگیشن نظام بند کر رکھے تھے اور بحریہ کی تنبیہات کو نظر انداز کیا تھا۔ تاہم ان جہازوں کے نام، پرچم، ملکیت اور عملے کی حالت سے متعلق تفصیلات جاری نہیں کی گئیں، جبکہ تینوں واقعات کی آزاد ذرائع سے تصدیق بھی نہیں ہوئی۔

دوسری جانب برطانیہ کے میری ٹائم ٹریڈ آپریشنز ادارے نے جمعرات کو آبنائے ہرمز میں عمان کے علاقے خصب سے تقریباً 9 بحری میل شمال میں ایک جہاز میں آگ لگنے کی اطلاع کی تصدیق کی۔ ادارے کے مطابق ایک دوسرے جہاز کے کپتان نے آگ دیکھنے کی اطلاع دی، تاہم متاثرہ جہاز کے عملے کی حالت، نقصان کی نوعیت اور آگ لگنے کی وجہ فوری طور پر معلوم نہیں ہو سکی۔ یہ واضح نہیں کہ یہ واقعہ ایرانی حکام کے بیان کردہ تین ٹینکروں میں سے کسی سے متعلق ہے یا نہیں۔