آسٹریلوی بحریہ کے جنگی جہاز میں خفیہ ریکارڈنگ ڈیوائس برآمد، خواتین اہلکاروں کی نجی ویڈیوز آن لائن جاری ہونے کا خدشہ

سڈنی(ڈیلی اردو) آسٹریلیا کی بحریہ کے جہاز ایچ ایم اے ایس لیووِن میں ویڈیو ریکارڈ کرنے والا ایک آلہ ملنے کے بعد تحقیقات شروع کردی گئی ہیں۔ یہ ڈیوائس 11 اکتوبر کو ریاست کوئنزلینڈ کے شہر کیئرنز میں لنگرانداز جہاز کے ایک کیبن سے برآمد ہوئی تھی۔ آسٹریلوی محکمۂ دفاع نے واقعے کی تصدیق کرتے ہوئے کہا ہے کہ معاملہ فوجی پولیس کے حوالے کردیا گیا ہے اور شہری حکام بھی تحقیقات میں تعاون کررہے ہیں۔

آسٹریلوی نشریاتی ادارے اے بی سی نیوز کے مطابق، ابتدائی معلومات سے ظاہر ہوتا ہے کہ آلہ خواتین کے لیے مخصوص کیبن میں پایا گیا تھا۔ آزاد سینیٹر جیکی لیمبی نے پارلیمان میں بتایا کہ انہیں بحریہ کے ایک سابق اہلکار کی جانب سے اطلاع ملی تھی کہ جہاز میں خواتین ملاحوں کے شاورز میں خفیہ کیمرے نصب پائے گئے ہیں۔ تاہم محکمۂ دفاع نے آلے کی درست جگہ کی باضابطہ تفصیل جاری نہیں کی۔

جیکی لیمبی نے اس خدشے کا بھی اظہار کیا کہ کیمروں کے ملنے سے پہلے ان کی ریکارڈنگ انٹرنیٹ پر اپ لوڈ کی جاچکی ہوسکتی ہے۔ ان کا کہنا تھا کہ حکام کو یہ معلوم کرنا چاہیے کہ آیا کسی اہلکار کی نجی لمحات میں اس کی اجازت کے بغیر ریکارڈنگ کی گئی اور کیا ایسی ویڈیوز کسی کے ساتھ شیئر بھی ہوئیں۔ تاہم اب تک ویڈیوز ریکارڈ ہونے یا آن لائن جاری کیے جانے کی سرکاری تصدیق سامنے نہیں آئی۔

برطانوی اخبار دی گارڈین اور آسٹریلوی نشریاتی ادارے اے بی سی نیوز کے مطابق، تحقیقات مکمل ہونے تک جہاز کو کیئرنز میں ہی روکے رکھا گیا ہے تاکہ تفتیش کی جاسکے اور عملے کو ضروری مدد فراہم کی جاسکے۔ آسٹریلوی محکمۂ دفاع نے واقعے کو انتہائی سنجیدہ قرار دیتے ہوئے کہا ہے کہ عملے کی فلاح و بہبود اس کی ترجیح ہے۔ حکام نے متاثرہ اہلکاروں کے تحفظ اور جاری تحقیقات کا حوالہ دیتے ہوئے مزید تفصیلات دینے سے گریز کیا ہے۔

واقعے نے آسٹریلوی دفاعی اداروں میں خواتین اہلکاروں کے تحفظ اور نجی زندگی کے احترام سے متعلق سوالات کو دوبارہ نمایاں کردیا ہے۔ گرینز پارٹی کے دفاعی امور کے ترجمان ڈیوڈ شوبریج نے بھی اس واقعے پر تشویش ظاہر کی ہے۔ فی الحال یہ واضح نہیں کہ ریکارڈنگ ڈیوائس کس نے نصب کی، آیا کسی کی شناخت ہوئی ہے یا اسی نوعیت کے آلات دوسرے بحری جہازوں میں بھی موجود ہیں۔