اسرائیلی فوج کے غزہ پر زمینی اور فضائی حملے

غزہ (ڈیلی اردو) قابض صہیونی فوج کی طرف سے فلسطین کے علاقے غزہ کی پٹی پر فضائی اور زمینی حملے کیے ہیں۔

آج سوموار کو علی الصباح اسرائیلی فوج نے مغربی خان یونس میں نیو بندرگاہ پر خان یونس کے قریب کم سے کم تین میزائل داغے۔

مرکز اطلاعات فلسطین کے مطابق اسرائیلی فوج نے دیر البلح میں دو میزائل داغے جب کہ اسی مقام پر کچھ دیر قبل بھی بمباری کی گئی تھی۔

غیر ملکی خبر رساں ادارے کے مطابق اسرائیلی فوج نے شمالی غزہ میں توپ خانے سے بمباری کی۔ تاہم اس بمباری کے نتیجے میں کسی قسم کے جانی نقصان کی اطلاع نہیں ملی۔

اس اسرائیلی حملے میں غزہ سے کسی قسم کے جانی یا مالی نقصان کی کوئی اطلاع نہیں ملی ہے۔

اتوار کی شب فلسطینی علاقے سے اسرائیل کے جنوبی علاقے کی جانب ایک راکٹ فائر کیا گیا تھا جس کے بعد وہاں فضائی حملے سے خبردار کرنے والے سائرن بج اٹھے تھے اور سیکڑوں افراد بم حملے سے محفوظ رکھنے والی پناہ گاہوں کی جانب بھاگ دوڑے تھے۔

غزہ کے شمال مشرق میں واقع اسرائیلی علاقے شعار ہینگیف کی علاقائی کونسل کی خاتون ترجمان نے کہا ہے کہ راکٹ بظاہر ایک کھلے میدان میں گرے ہیں۔

28 جنوری کو امریکی صدر ڈونلڈ ٹرمپ کے اعلان کردہ مشرق اوسط امن منصوبے کے بعد اسرائیل اور فلسطینیوں کے درمیان کشیدگی میں اضافہ ہوا ہے اور غرب اردن اور غزہ کی پٹی میں تشدد کا نیا سلسلہ شروع ہوگیا ہے۔

غربِ اردن میں فلسطینی اتھارٹی اور غزہ کی پٹی میں حماس اور اس کی اتحادی جماعتوں نے صدر ٹرمپ کے اعلان کردہ مشرق اوسط امن منصوبہ کو مسترد کردیا ہے۔ اس کے تحت اسرائیل کو مقبوضہ بیت المقدس پر مکمل کنٹرول حاصل ہوجائے گا۔وہ غربِ اردن میں تعمیر کردہ تمام یہودی بستیوں کو ریاست میں ضم کرسکے گا۔اس کے علاوہ دوسرے علاقوں میں بھی اپنا قبضہ برقرار رکھ سکے گا۔

اگر فلسطینی یہ امن منصوبہ قبول کرلیتے ہیں تو اس کے بدلے میں انھیں غرب اردن اور غزہ کی پٹی کے دوسرے علاقوں میں محدود خود مختاری کی حامل ریاست کی پیش کش کی جائے گی۔

صدر ٹرمپ کے اعلان کے بعد سے غزہ سے اسرائیلی علاقے کی جانب متعدد راکٹ اور بارودی غبارے چھوڑے گئے ہیں۔حماس نے مقبوضہ بیت المقدس میں اسرائیلی فوج پر حملے کی تعریف کی تھی۔ ایک فلسطینی نے اپنی گاڑی اسرائیلی فوجیوں پر چڑھا دی تھی جس سے 12 فوجی زخمی ہوگئے تھے۔

اسرائیلی فوجیوں نے جواب میں غرب اردن کے مختلف علاقوں میں تشدد کی کارروائیوں میں چار فلسطینیوں کو شہید کر دیا تھا۔