اسلام آباد کچہری حملہ: ’خودکُش بمبار کا تعلق افغانستان سے تھا،‘ طلال چوہدری

اسلام آباد/وانا (نمائندہ ڈیلی اردو/بی بی سی) پاکستان کے وزیر مملکت برائے داخلہ طلال چوہدری نے دعویٰ کیا ہے کہ اسلام آباد کچہری پر حملہ کرنے والا خودکش بمبار افغانستان کا شہری تھا۔

بدھ کے روز ایک نجی ٹی وی پروگرام میں گفتگو کرتے ہوئے وزیر مملکت نے بتایا کہ ابتدائی تحقیقات میں یہ بات سامنے آئی کہ خودکش بمبار نہ پاکستان کی مقامی زبان سمجھ سکتا تھا اور نہ ہی پاکستانی کرنسی نوٹ پہچان سکتا تھا۔

ان کے مطابق بمبار اسلام آباد میں داخل ہونے کے بعد مختلف موٹر سائیکلوں پر سفر کرتا رہا اور کرایہ ادا کرنے میں مشکلات کا سامنا کرنا پڑا۔ اسلام آباد کچہری دھماکے میں 12 افراد ہلاک اور 21 زخمی ہوئے، جب بمبار کی موٹر سائیکل پولیس وین سے ٹکرا گئی۔

اسی طرح وانا میں کیڈٹ کالج پر پیر کے روز دہشت گردانہ حملہ ہوا، جس میں مسلح حملہ آور کالج میں داخل ہو کر مورچہ بندی کر گئے۔ سکیورٹی دستوں نے انہیں گھیر لیا اور مجموعی جھڑپ 24 گھنٹے سے زائد جاری رہی، جس کے بعد تینوں عسکریت پسند ہلاک ہو گئے۔

پاکستان نے ان حملوں میں بھارت اور افغانستان کے ملوث ہونے کے الزامات عائد کیے ہیں، جبکہ بھارت نے الزام کی تردید کر دی اور افغانستان نے پاکستان میں ہونے والے دھماکوں کی مذمت کی ہے۔

وزیرِ داخلہ محسن نقوی نے بھی پارلیمنٹ ہاؤس میں کہا کہ وانا اور اسلام آباد کے خودکش حملہ آور افغانستان سے تعلق رکھتے ہیں اور یہ ممکن نہیں کہ پاکستان میں حملے کیے جائیں اور مذاکرات کی بات کی جائے۔

وزیر مملکت نے مزید کہا کہ افغان طالبان اور تحریک طالبان پاکستان نظریاتی اور آپریشنل طور پر ایک دوسرے کے ساتھی ہیں، جبکہ دوحہ معاہدے اور دیگر یقین دہانیوں پر افغانستان نے عمل نہیں کیا۔ 

پاکستان چاہتا تھا کہ افغان طالبان کے سربراہ ملا ہیبت اللہ ٹی ٹی پی کے حوالے سے واضح فتویٰ جاری کریں، لیکن مذاکرات میں اتفاقِ رائے نہ ہو سکا۔