اسلام آباد کچہری دھماکا: خودکش حملہ آور کے سہولت کار اور ہینڈلرز گرفتار

اسلام آباد (نمائندہ ڈیلی اردو) وفاقی دارالحکومت اسلام آباد کے جوڈیشل کمپلیکس کے باہر ہونے والے خودکش دھماکے کے بعد سیکیورٹی اداروں نے پانچ مشتبہ افراد کو حراست میں لینے کا دعویٰ کیا ہے۔

اسلام آباد سی سی ڈی کے ایک اہلکار نے نام ظاہر نہ کرنے کی شرط پر بتایا کہ گرفتاریاں اسلام آباد اور راولپنڈی کے مختلف علاقوں میں انٹیلیجنس بیسڈ آپریشنز (IBOs) کے دوران عمل میں آئیں۔ اہلکار کے مطابق یہ کارروائیاں سیف سٹی کیمروں کی فوٹیجز اور آرٹیفیشل انٹیلیجنس سے حاصل ہونے والے شواہد کی بنیاد پر کی گئیں۔

اہلکار کا کہنا ہے کہ زیرِ حراست افراد میں وہ مشتبہ افراد بھی شامل ہیں جن پر شبہ ہے کہ وہ خودکش حملہ آور کے سہولت کار اور ہینڈلر تھے۔ تمام گرفتار افراد پاکستانی شہری ہیں اور ان کا تعلق خیبر پختونخوا سے ہے۔

انہوں نے بتایا کہ ملزمان سے تفتیش جاری ہے۔